Оңтүстік Кореядан Қазақстанға келетін туристер саны артты

Қазақстан және Алматы қаласы биыл Оңтүстік Кореяда ең танымал туристік бағыттардың бірі ретінде танылды.

Бұл туралы кеше Кореядағы  ірі туристік компания мәлімдеді. Ал әлемге әйгілі қонақүй брондау жүйесінің деректеріне сәйкес, оңтүстіккореялықтардың Қазақстанға қатысты іздеу сұраныстары өткен жылмен салыстырғанда 295 пайызға артқан.

Қазақстан - қарым-қатынасқа негізделген турлар арасындағы ең танымал бағыт. Мұндай деректерді жыл қорытындысы бойынша Оңтүстік Кореяның ең ірі туристік компаниясы жариялады. Қарым-қатынасқа арналған турлар - бұл саяхатшылардың тек көрікті жерлерді бірге аралап қана қоймай, жергілікті тұрғындармен де танысатын топтық сапар форматы. Мұндай саяхаттар жастар арасында кең таралған және блогерлердің, аспаздардың, фотографтардың немесе жаттықтырушылардың қатысуымен өтеді.

Тағы бір жағымды жаңалық. Штаб-пәтері Сингапурда орналасқан әлемге әйгілі қонақүй брондау жүйесі оңтүстіккореялықтар арасында Қазақстанға деген қызығушылықтың артқанын хабарлады. Қазақстан туралы интернеттен іздеу  295 пайызға, ал Алматы жөніндегі сұраулар 348 пайызға өскен. Сарапшылардың айтуынша, бұл мегаполисте саяхатшыларды дәстүрлі базарлар, көркем галереялар және таудағы демалыстың алуан түрі қызықтырады.

Чой До Юн, Сеул қаласының тұрғыны:

- Париж немесе Нью-Йорк сияқты танымал бағыттардың орнына мен трендке айналған елді таңдадым. Қазақстанды «Орталық Азияның Швейцариясы» деп атайды, сондықтан Алматыға баруды жөн көрдім. Алғашқы күндері табиғатты көргім келеді - Көлсай көлдері мен Шарын шатқалына баруды жоспарлап отырмын. Кейін қала орталығын мысалы, Орталық музейді аралағым келеді.

Сарапшылар Қазақстанға деген мұндай қызығушылықты Еуразиядағы күрделі геосаяси жағдаймен байланыстырады. Қазіргі таңда Оңтүстік Корея мен Ресейді байланыстыратын тікелей әуе рейстері жоқ. Сонымен қатар, биыл қазақстандық туристік компаниялар да белсенді жұмыс атқарды. 5-8 маусым аралығында өткен Азиядағы ең ірі туристік көрмелердің бірі - Seoul International Tourism Fair аясында Алматы қаласының стенді үздік деп танылды. Көрмеде Көлсай көлдері, Шарын шатқалы, Қайыңды көлі және Шымбұлақ тау курорты таныстырылды. Сондай-ақ келушілер VR-көзілдіріктер арқылы мегаполиске виртуалды саяхат жасай алды.

Осы айда Оңтүстік Корея астанасында Сеулдегі елшілігіміздің қолдауымен Қазақстан бойынша туристік жолсілтеме таныстырылды. Бұл кітапта негізгі көрікті жерлер сипатталып, қазақстанның қалалары мен ауылдарында еркін жүріп-тұруға қажетті  кеңестер берілген.

Нұрғали Арыстанов, ҚР Корея Республикасындағы Елшісі:

- 2025 жылдың алғашқы тоғыз айында Қазақстанға Кореядан 41 400 турист келді, бұл өткен жылдың осы кезеңімен салыстырғанда 20 пайызға көп. Ал Қазақстаннан Кореяға 46 500 азамат сапарлаған, бұл 12 пайыздық өсімді көрсетеді.

Сонымен қатар биыл көктемде Сеул мен Алматы арасында оңтүстіккореялық лоукостердің тікелей әуе рейстері ашылды. Қазір екі ел арасында аптасына шамамен 20 әуе рейсі қатынайды және бұл көрсеткішті екі есеге арттыру жоспарланып отыр. Екі ел арасындағы мәдени, экономикалық байланыстарға оң әсер ететін тағы бір маңызды оқиға – Корея – Орталық Азия саммиті болмақ. Ол 2026 жылы Сеулде өтеді деп жоспарланған.

Авторлары: Владислав Цой, Ольга Лян