Қазақстаннан миллиард теңгеге жуық соманың табиғи байлығы заңсыз шығарылды

Ұлытау облысында марганец кенін заңсыз өндіріп, оны Қазақстаннан тыс жерлерге экспорттаумен айналысқан топтың әрекетіне тосқауыл қойылды. Қаржылық мониторинг агенттігінің мәліметінше, сатылған шикізаттың құны 950 миллион теңгеден асқан, деп хабарлайды Tengrinews.kz.

ҚМА ақпаратына сәйкес, заңсыз өндіріс Қаражал қаласындағы "Восточный" карьерінің аумағында ұйымдастырылған. Ол үшін экскаваторлар, тиегіштер мен ауыр жүк көліктері секілді арнайы карьер техникасы пайдаланылған.

Карьер аумағында өндірістік база да жабдықталған. Онда өндірілген шикізат ұсақтау-жуу кешенінің көмегімен өңделіп отырған.

Өңделгеннен кейін марганец кені құжаттарды пайдалана отырып, жүк көліктерімен Қазақстан аумағынан тыс жерлерге тасымалданған.

Сатылған кеннің көлемі 4 мың текше метрден асса, оның құны 950 миллион теңгеден жоғары болған.

Тергеу жалғасып жатыр.

Заңды ЖШС ретінде алтын өндірген: полиция ШҚО-дағы схеманың жолын кесті

Бізді Google-дың негізгі дереккөздер тізіміне қосыңыз