Қазақстанда 1,2 миллиард теңгеге киік мүйізі саудаға шығарылды

Қазақстанда ақбөкен мүйізі аукционға шығарылды. Лот e-Qazyna.kz электронды сауда порталында жарияланды, - деп хабарлайды Tengrinews.kz тілшісі.

Сатылымда бір тонна мүйіз

Сауда-саттықта бір тонна киік мүйізін өткізу жоспарланған. Жалпы бағасы – 1 227 148 000 теңге.

Лотқа тіркелген суреттен мүйіздер қораптарға салынғанын көруге болады. Оларды Экология және табиғи ресурстар министрінің бұйрығымен "Жасыл даму" АҚ сатылымға шығарған. Құжатта 2026 жылғы 30 шілде көрсетілген.

Саудаға шығарылған киік мүйіздері. e-Qazyna.kz порталынан алынған сурет

"Жасыл даму" акционерлік қоғамы 1 (бір) тонна көлеміндегі киік дериваттарын өткізсін. Ақбөкен мүйізінің бір келісі үшін баға 2600 (екі мың алты жүз) АҚШ долларына баламалы сомада белгіленсін", – делінген құжатта.

Саудаға шығарылған киік мүйіздері. e-Qazyna.kz порталынан алынған сурет

Сауда-саттық 8 қыркүйекте басталды. Қазіргі уақыттағы сауда мәртебесі – "Конкурсқа қатысушылардың өтінімдерін ашу хаттамасын күту".

Бұған дейін бұрынғы экология министрі Ерлан Нысанбаев мұндай киік мүйізі саудасынан түскен қаражат жануарларды қорғау мен биоалуантүрлілікті сақтауға жұмсалатынын айтқан болатын.

ҚАЗІР ТАЛҚЫЛАНЫП ЖАТЫР

306 заңбұзушылық: Астанада жүргізуші жазаланды

Кеше 18:00 1

Мүйіздердің бұл партиясын тамызда да дәл осы бағаға сатпақ болған. Алайда сатып алушылар табылмады.

Еске салайық: 1999 жылы Қазақстанда ақбөкендерді, олардың ұшаларын, мүйіздерін кез келген мақсатта пайдалануға тыйым салынды. Тыйым 20 жылдан аса уақыт бойы күшінде болды. Осы кезеңде олардың саны бірнеше есе артты.

2023 жылдың қазанында ақбөкендер реттелуге жататын жануарлар тізіміне ресми түрде енгізіліп, оларды атуға рұқсат берілді. 2024 жылы ату процесі тоқтатылды. Алайда 2025 жылдың жазында ақбөкендерді атуға қайта рұқсат етілді. Сонымен қатар, ел ақбөкен мүйіздерін экспорттауға рұқсат алды – нөлдік экспорттық квота жойылды.

Ақбөкен мүйіздері дәстүрлі шығыс медицинасында қымбат тұратын қызуды басатын және тыныштандыратын дәрі ретінде қолданылады.

Оңтүстік-Шығыс Азия елдерінде мүйіз құрамының негізгі элементі – ұнтақталған кератин емдік эликсирлерге қосылып, құрысуды, бауыр ауруларын емдеу және жоғары температураны түсіру үшін пайдаланылады. Сонымен қатар, заманауи дәлелді медицина тұрғысынан олардың терапиялық әсері кәдімгі фармацевтикалық препараттардың әсерінен асып түспейді.

Ақбөкендерді заңсыз аулау қара базардағы олардың мүйіздерінің жоғары құнына байланысты болып отыр. Бұған дейін біз 2024 жылдың маусымында Жетісу облысындағы үйлердің бірінің шатырынан 1,2 миллиард теңгенің киік мүйізі табылғаны туралы жазған болатынбыз.

Полицейлер тәркіленген ақбөкен мүйіздерінің партиясын тексеріп жатыр. Полицияның баспасөз қызметінен алынған сурет

Бұл қораптардың ішінде 464 мүйіз болған. Ол кезде 39 жастағы ер адам ұсталды.

Бізді Google-дың негізгі дереккөздер тізіміне қосыңыз