Қазақстанның он дүркін чемпиондары Әділет партиясын қолдады

Биыл Қазақстан чемпионы атағын оныншы рет жеңіп алған «Жетісу» әйелдер волейбол клубы алдағы Құрылтай сайлауында «Әділет» партиясын қолдады. Бұл туралы команда өкілдері Талдықорғанда партияның республикалық сайлауалды штабымен өткен кездесуде мәлімдеді. Спортшылармен кездесу «Жетісу» кәсіби волейбол клубының алаңында өтті, - деп хабарлайды Aikyn.kz сайты «Әділет» партиясының баспасөз қызметіне сілтеме жасап. 

Партия Төрағасы Айбек Дәдебай кездесу қатысушыларын Халықаралық жастар күнімен құттықтап, қазақстандық жастарға спортпен айналысуға мүмкіндік жасау мемлекеттік саясаттың маңызды бағыттарының бірі болып қала беретінін атап өтті. Оның айтуынша, бүгінде бұқаралық спортты және өңірлердегі заманауи спорт инфрақұрылымын дамытуға ерекше көңіл бөлініп отыр.

«Халықаралық жастар күнімен құттықтаймын! Сіздерге сәттілік, жаңа жетістіктер мен жеңістер тілеймін. Жастарымыздың дамуы мен өз әлеуетін көрсете алуы үшін, соның ішінде спортта да, барлық мүмкіндіктің болғаны маңызды. Мемлекет басшысы бұқаралық спортты дамытуға және спортшыларымызға лайықты жағдай жасауға ерекше көңіл бөледі. Оның тапсырмасы бойынша, өңірлерде заманауи спорт инфрақұрылымы дамып, балалар мен жастар үшін, әсіресе ауылдық жерлерде де мүмкіндіктер кеңейіп келеді. Бұл жұмыстың нәтижесінің бірін осы жердегі «Жетісу» волейбол клубының заманауи кешенінен көріп отырмыз», – деді Айбек Дәдебай.

Кездесуде спортшылар кандидаттардан партия балалар мен ауыл тұрғындары үшін спортты қалай қолжетімді етуді ұсынып отырғанын сұрады.

Құрылтай депутаттығына кандидат Максим Рожин партияның сайлауалды бағдарламасындағы бастамалар туралы айтып берді. Атап айтқанда, салауатты өмір салтын қалыптастыруға бағытталған «Саламатты шаңырақ» ұлттық науқаны және оқушылардың денсаулығын нығайтуға бағытталған «Саламатты мектеп» шаралары туралы сөз болды.

«Әділет» партиясының тағы бір ұсынысы – мектеп және студенттік спорт лигаларын кеңейту. Қазақ күресі, тоғызқұмалақ және асық ату сияқты ұлттық спорт түрлерін балалар мен жастардың тұрақты спорттық өмірінің бір бөлігіне айналдыру ұсынылады.

Партия 2029 жылға қарай ел халқының кемінде жартысы тұрақты түрде спортпен айналысуы үшін жағдай жасауды ұсынады. Ауылдық елді мекендерде тез құрастырылатын модульдік спорт нысандарының құрылысын жалғастыру жоспарланып отыр. Сондай-ақ бүкіл ел бойынша партия негізгі спорт нысандарын жаңғыртып, жаңаларын салуды ұсынады.

Тағы бір мәселе жаттықтырушыларға қатысты. «Әділетті болашақ үшін» сайлауалды бағдарламасында спортшылардың нәтижелері мен дамуы үшін ынталандыру төлемдері жүйесін енгізу ұсынылады.

Кездесу барысында «Жетісу» волейболшысы Назгүл Мақұлбек сәуір айында команданың Қазақстан чемпионатын оныншы рет жеңіп алғанын еске салды. Ол партияға сайлауда жеңіс тілеп, кандидаттарға аты-жөні жазылған волейбол добын табыстады.

«Біздің «Жетісу» командамыз – Қазақстанның он дүркін чемпионы. «Әділет» партиясына осы сайлауда да, келесі сайлауларда да жеңімпаздар қатарынан көріне беруін тілеймін», – деді волейболшы.

Партияны қолдайтынын үстел ойындары және спорттық туризм бойынша балалар-жасөспірімдер спорт мектебі директорының орынбасары Азамат Мұқанов та білдірді. Ол өңір тұрғындарын сайлауға қатысып, «Әділет» партиясына дауыс беруге шақырды.

Кездесуді қорытындылай келе, Айбек Дәдебай спортпен айналысу мүмкіндігі баланың қай жерде тұратынына байланысты болмауы керек екенін айтты.

«Қалаларда да, ауылдық жерлерде де спортпен айналысуға тең мүмкіндік жасау маңызды. Сондықтан біз балалар-жасөспірімдер спортын дамытуды, спорт мектептерінің материалдық базасын нығайтуды және өңірлердегі қолжетімді инфрақұрылымды кеңейтуді ұсынамыз. Бұл ретте спортшыларды даярлауда негізгі рөл жаттықтырушыларға тиесілі. Олардың еңбегі лайықты бағалануы керек. Партияның сайлауалды бағдарламасында спортшылардың нәтижелері мен дамуы үшін ынталандыру төлемдері жүйесін енгізу көзделген. Біздің міндетіміз – әрбір дарынды бала тұрғылықты жеріне қарамастан, өз әлеуетін көрсете алатын жағдай жасау», – деді Айбек Дәдебай.