Қазақстанның төлем жүйесі арқылы 1,6 квадриллион теңге өтті Ұлттық банк мәліметтерді бөлісті

2025 жылы Қазақстанның ұлттық төлем жүйелері арқылы 1,6 квадриллион теңге өткен. Бүгінде олар еліміздегі барлық қолма-қол ақшасыз төлемдердің шамамен 90 пайызын өңдейді. Бұл туралы Ұлттық банк төрағасының орынбасары Бинұр Жәленов мәлімдеді, - деп хабарлайды Tengrinews.kz.

15 нөлі бар сома: Ұлттық банк деректері

Жәленовтың айтуынша, Ұлттық банк ұлттық төлем жүйелерін 1995 жылдан бері дамытып келеді. Бүгінде олар елдің ұлттық цифрлық қаржы инфрақұрылымының негізі болып табылады.

"Қазірдің өзінде еліміздегі қолма-қол ақшасыз төлемдердің жалпы көлемінің шамамен 90 пайызы біздің ұлттық төлем жүйелеріміз арқылы өтеді. Былтыр олар арқылы 1,6 квадриллион теңге сомасына төлемдер өңделді. Бұл - орасан зор көрсеткіш", - деді ол.

Ұлттық банк төрағасы орынбасарының айтуынша, ұлттық төлем жүйелері күн сайын шамамен 6 триллион теңгені өңдейді.

"Бұл әлеуметтік жәрдемақы төлемдері, қаржы нарығындағы операциялар, банкаралық есеп айырысулар және басқа да көптеген төлем", - деді ол.

Сондай-ақ Бинұр Жәленов Президент тапсырмасы бойынша кейінгі жылдары енгізілген цифрлық сервистерге тоқталды.

Олардың қатарында цифрлық теңге, карталық свитч, сондай-ақ биометриялық сәйкестендіру жүйесі бар.

Жәленовтың сөзінше, биометриялық сәйкестендіру сервисі банк шоттарын қашықтан ашуда, онлайн-несие рәсімдеуде және басқа да қаржылық қызметтерді алу кезінде қолданылады.

"Тек өткен жылдың қорытындысы бойынша осындай 50 миллионға жуық сұраныс өңделді. COVID-19 пандемиясы кезінде дәл осы жүйе азаматтарға шоттарды қашықтан ашуға және мемлекеттік жәрдемақылар мен қаржылық қызметтерге қол жеткізуге мүмкіндік берді", - деп түсіндірді Ұлттық банк төрағасының орынбасары.

Биыл қаңтарда Президент Ұлттық цифрлық қаржы инфрақұрылымының құқықтық мәртебесін бекітетін заңға қол қойды. Оның құрамына ұлттық төлем жүйелері, цифрлық теңге платформасы, биометриялық сәйкестендіру жүйесі, банкаралық төлем сервистері және Ұлттық антифрод-орталық енді.

Бұған дейін цифрлық теңгенің енгізілуі туралы егжей-тегжейлі айтқан болатынбыз. Жоба біртіндеп өнеркәсіптік пайдалануға көшіп жатыр, ал оның негізгі міндеттерінің бірі ретінде мемлекеттік шығыстардың ашықтығын арттыру және жаңа цифрлық қаржылық сервистер құру аталып отыр.

Google News арқылы жаңалықтарымызды қадағалаңыз