Қазақтелеком Павлодарда ЖИ деректер орталығын салады

Министрдің айтуынша, трансшекаралық байланыс инфрақұрылымы мен қолжетімді электр энергиясының болуы халықаралық есептеу қуаттары хабын құрудың міндетті шарты саналады. 

— Бұл жоба қазірдің өзінде белсенді жүзеге асырылып жатыр. Павлодар облысында жер телімі бөлініп, ГРЭС-1 станциясынан 300 МВт қуат резервке қойылды. Халықаралық инвесторлармен келіссөздер жүргізіліп жатыр. Алайда біз ешкімді күтпейміз. «Қазақтелеком» келесі жылдың екінші тоқсанында алғашқы 50 МВт-тық ЖИ-деректер орталығын салады, — деді Ж. Мәдиев Үкіметтің кеңейтілген отырысында.

Бұл деректер орталығының қуаты мемлекеттік органдардың жаңа деректер орталығынан, онда орналасқан суперкомпьютермен қоса есептегенде 10 есе жоғары болады.

Жобалау және құрылыс жұмыстарын 2026-2028 жылдар аралығында кезең-кезеңімен жүзеге асыру жоспарланған.

— Бұл бағыт жаңа экономиканы қалыптастыруға негіз қалайды. Сонымен бірге, биыл мемлекеттік ақпараттық жүйелерді төтенше жағдайлар кезінде де тұрақты жұмыс істеуін қамтамасыз ету үшін толық резервтеу жүргізіледі, — деді Жасанды интеллект және цифрлық даму министрі.

Бұған дейін сала министрі пойыз бен ұшақ жолаушыларына интернет қолжетімді болатынын айтқан еді.