ҚазАвтоЖол Алматы Қорғас тасжолындағы көліктердің жаппай зақымдануын түсіндірді

Tengrinews.KZ парақшасынан алынған деректерге сүйене отырып, Qazaq24.com жаңалық жариялайды..

"ҚазАвтоЖол" ҰК" АҚ Алматы – Қорғас тасжолындағы көліктерді зақымдаған бетон бөлігіне қатысты пікір білдірді, - деп хабарлайды Tengri Auto.

"Әлеуметтік желіде тараған видеодағы жағдай ауыр жүк көлігі өткеннен кейін цемент-бетон жабынының бір бөлігі зақымдануынан болған. Көлік салмағының әсерінен бетон жабынның бір бөлігі үгітіліп, кейін сол жерден өткен жеңіл автокөліктер дөңгелектерін зақымдап алған", - делінген хабарламада.

Ұлттық компания мердігер ұйым жауапты жол қызметтерімен бірлесіп, салдарды жою бойынша жедел шаралар қабылдағанын атап өтті.

"Зақымдалған учаске норматив күйге келтірілді, көлік қозғалысы қалыпты режимде жүріп жатыр. Зардап шеккен көлік иелеріне келтірілген шығынды мердігер ұйым толық көлемде өтеді", - деп хабарлады "ҚазАвтоЖол" өкілдері.

Бұл дерек бойынша Полиция департаменті мердігер ұйымға айыппұл түріндегі әкімшілік жауапкершілік шараларын қолданды. Мұндай жағдайлардың алдын алу үшін ауа температурасы көтерілген кезеңде цемент-бетон жабынының жай-күйіне тұрақты мониторинг ұйымдастырылып, қауіпті учаскелерде профилактикалық іс-шаралар жүргізіліп жатыр. Жағдай жауапты жол қызметтерінің бақылауында.

Сондай-ақ, "ҚазАвтоЖол" мамандары республикалық маңызы бар Алматы – Шелек – Қорғас автожолының цемент-бетон жабыны бар учаскелеріне тексеру жүргізді.

"Тексеру нәтижесінде цемент-бетон плиталарының температуралық деформациялану белгілері бар 31 учаске анықталды. Ақауды алдын алу мақсатында 21 учаскеде қосымша деформациялық жіктерді кесу жұмыстары орындалды. Қалған 10 учаске бойынша жұмыс істеліп жатыр және мамандардың тұрақты бақылауында", - деп хабарлады ұлттық компания.