ҚазҰУ дағы ескі телестудия жаңа келбетке енді

Профессор Марат Барманқұловтың қызы Алуа Барманқұлова телестудияға жыл сайын келетінін, бірақ бұл жолы жаңарған студияны танымай қалғанын айтты. 

– Әл-Фараби атындағы Қазақ ұлттық университетінің журналистика факультеті жыл сайын әкемнің туған күнін «Барманқұлов оқуларымен» атап өтеді. Әр жолы отбасымыздың бір мүшесін арнайы шақырады. Бізді ұмытпай, әрдайым құрметпен шақыратынына ризамыз. Ал телестудияның қазіргі келбеті ерекше әсер қалдырды. Жөндеу жұмыстары да, жаңа техникалық жабдықтар да көңілімнен шықты, - деді ол.

Журналистика факультетінің деканы Қанат Әуесбайдың айтуынша, бүгінгі студенттер подкаст жазуға, мультимедиалық контент жасауға ерекше қызығушылық танытып отыр.

– Мұнда студенттеріміз теория жүзінде алған білімін тәжірибемен ұштастыра алады. Алдағы уақытта бұл телестудияда түрлі подкастар, сұхбаттар мен телесюжеттер дайындалады. Біз бұл аудиторияның факультеттің тұрақты зертханалық әрі өндірістік базасына айналатынына қуаныштымыз. Сол мақсатта заманауи камералар сатып алынып, жарық жүйесі толық жаңартылды. Енді студенттер төрт түрлі алаңда өз стендаптарын түсіріп, сұхбат және хабар дайындай алады, - деді Қанат Әуесбай.

Марат Барманқұлов – Қазақстандағы теле-радиожурналистиканың негізін қалаған тұлға. 1966 жылы ол ҚазҰУ журналистика факультетінде алғашқы телевизиялық зертхана мен телерадиожурналистика кафедрасын құрды. Сол кездегі телестудияда бар болғаны бір бейнекамера мен монтаж үстелі ғана болған. 

90-жылдардың ортасында ЮНЕСКО-ның қолдауымен студия заманауи техникалық құралдармен жабдықталып, оқу процесінде тележурналистика пәндерін тәжірибелік тұрғыда оқытуға мүмкіндік туды. 

2009 жылы зертхана Марат Барманқұлов атындағы ҚазҰУ телерадиокешені (ТРК) мәртебесін алып, студенттер мен оқытушылар үшін шығармашылық және кәсіби тәжірибе алаңына айналды. Мұнда тележурналистика, бейнемонтаж және телевизиялық бағдарламалар дайындау бойынша сабақтар өткізіледі.

2025 жылы телестудия толық күрделі жөндеуден өтіп, заманауи бейне және дыбыс жабдықтарымен жаңартылды. Енді студенттер жаңа форматтағы телевизиялық және мультимедиалық жобалар әзірлеп, деректі фильмдер мен подкасттар дайындауға мүмкіндік алады.

Еске салайық, бұған дейін әл-Фараби атындағы ҚазҰУ базасында Хайнань спутниктік деректер орталығы және Қытайдың Солтүстік-батыс политехникалық университетімен бірлескен жерүсті спутниктік станциясы салынатынын хабарлағанбыз.