Қоғамдық ұйымдар Қазақстанның және Президенттің атынан мемлекеттік емес наградалармен марапаттай алмайды

— 2025 жылы «Қазақстан Республикасының мемлекеттік наградалары туралы» заңның 42-бабына өзгерістер мен толықтырулар енгізілді.

Атап айтқанда, қоғамдық бірлестіктерге, қоғамдық қорларға, басқа да үкіметтік емес ұйымдарға сыртқы түрі мен атауы мемлекеттік наградаларға толықтай немесе қандай да бір бөлігі ұқсас ордендер мен медальдарды, омырауға тағатын белгілер мен оларға қоса берілетін құжаттарды тағайындауға және жасауға тыйым салу нормалары көзделді.

Сондай-ақ Қазақстан Республикасының, Қазақстан халқының және Мемлекет басшысының атынан мемлекеттік емес наградалармен наградтауға жол берілмейді.

Бұл ретте Мәдениет және ақпарат министрлігі елімізде тіркелген 20 мыңға жуық қоғамдық ұйымға тұрақты түрде талдау және мониторинг жұмыстарын жүргізеді, — деді Серік Жұманғарин.

Вице-премьердің атап өтуінше, қазіргі таңда Мәдениет министрлігі халықаралық, оның ішінде ТМД елдерінің тәжірибесін зерделей отырып, «Қоғамдық бірлестіктер туралы» және «Коммерциялық емес ұйымдар туралы» заңдарға өзгерістер мен толықтырулар енгізу үшін заң жобасын әзірлеп, пысықтап жатыр. Ондағы нормалар қоғамдық бірлестіктердің, қоғамдық қорлардың, басқа да үкіметтік емес ұйымдардың наградаларына қойылатын талаптарды күшейтуге бағытталған.

— Заң қабылданған жағдайда қоғамдық бірлестіктер еліміздің және шетел азаматтарын қоғамдық ұйымдарға сіңірген еңбектері үшін ғана өздерінің наградаларымен марапаттауға құқылы болады. Бұған қоса қоғамдық ұйымдардың марапаттарын тіркеуге қатысты мәселені Қазақстан Республикасының Конституциясына және «Қоғамдық бiрлестiктер туралы» заңына сәйкес елімізде тіркелген барлық қоғамдық бірлестік, әртүрлі қоғамдық қорлар және басқа да коммерциялық емес ұйымдармен талқыланады, — деді ол.

Бұдан бөлек, Серік Жұманғарин елімізде «Қазақстан Республикасының мемлекеттік наградаларының ақпараттық жүйесі» платформасы жұмыс істейтіндігіне назар аудартады.

— Сондай-ақ әскери, арнаулы мемлекеттік, құқық қорғау және орталық атқарушы органдардың ведомстволық наградаларын есепке алу және саланы жүйелеу мақсатында Қазақстан Республикасы Президенті Іс басқармасымен бірлесе отырып, «Ведомстволық наградалардың ақпараттық жүйесі» платформасы жасалды. Ақпараттық жүйеде әрбір мемлекеттік органның өзіне тиесілі медальдары мен төсбелгілерінің жалпы саны, табысталған адамдар және оларды беру негіздемелері туралы ақпараттар, ведомстволық наградаларды табыстау жөніндегі комиссия туралы мәліметтер қамтылатын болады, — деді ол.

Бұған дейін педагогтер медальді неге сатып алатыны туралы жазған едік.