Қолжетімді интернеттің арқасында 500 ден астам ауыл интернетке қосылды

«Қолжетімді интернет» ұлттық жобасы аясында Қазақстанда спутниктік технологияларды қолдану арқылы 504 ауылдық елді мекен интернет желісіне қосылды, – деп хабарлайды Aikyn.kz сайты.

Жоба Қазақстан Республикасының Жасанды интеллект және цифрлық даму министрлігі тарапынан жүзеге асырылды.

Ұлттық жобаның негізгі мақсаты – талшықты-оптикалық байланыс желілерін тарту немесе ұялы байланыс базалық станцияларын орнату экономикалық және техникалық тұрғыдан мүмкін емес, шалғай әрі халқы аз елді мекендерді интернетпен қамтамасыз ету. Осы мақсатта мұндай ауылдарда спутниктік байланыс жүйелері пайдаланылды.

Министрліктің мәліметінше, 2023 жылдан бастап
– KazSat спутниктері арқылы 176 ауылдық елді мекен,
– ал қалған 328 ауыл бейгеостационарлық спутниктік жүйелер (НГСО) негізіндегі OneWeb технологиясы арқылы, Jusan Mobile операторының қатысуымен интернетке қосылған.

Нәтижесінде, «Қолжетімді интернет» ұлттық жобасы аясында көзделген барлық 504 ауылдық елді мекен спутниктік интернетпен толық қамтылды.

Жобаның іске асырылуы ауыл тұрғындарына онлайн білім алу, электрондық мемлекеттік қызметтерді пайдалану, телемедицинаға қол жеткізу, сондай-ақ жақындарымен тұрақты байланыс орнату сияқты заманауи цифрлық мүмкіндіктерді ашты. Бұл өз кезегінде өңірлердегі өмір сапасын арттыруға және қала мен ауыл арасындағы цифрлық алшақтықты азайтуға мүмкіндік береді.