Қонаев қаласында флайбордшы Әділет туымен су үстінде шоу көрсетті

Қонаев қаласындағы Қапшағай су қоймасының жағалауында «Әділет» партиясының сайлауалды науқаны аясында ерекше шара өтті, – деп хабарлайды Aikyn.kz сайты.

Флайбордшы қыз партия туымен су үстіне көтеріліп, түрлі трюк көрсетті. Осы уақытта су айдынына желкенді қайықтар шығып, аспанға «Әділет» жазуы бар алып әуе шары көтерілді.

Шара жағалауда демалып жүрген тұрғындар мен қала қонақтарының назарын аударды. Флайбордшы су ағынының күшімен бірнеше метр биіктікке көтеріліп, түрлі қимылдар орындады. Көрсетілім кезінде ол «Әділет» туын желбіретті.

Шоумен қатар Қапшағай су қоймасының айдынына желкенді қайықтар шықты. Ал жағалау үстінде «Әділет» жазуы бар алып әуе шары қалықтап, алыстан көзге түсті.

Алайда шара тек ойын-сауық бағдарламасымен шектелген жоқ. Жағалауда «Әділет» партиясының қоғамдық қабылдау алаңы жұмыс істеді. Мұнда тұрғындар өздерін толғандырған мәселелерді көтеріп, түрлі салаға қатысты ұсыныс-тілектерін қалдырды. Сондай-ақ келушілер партияның «Әділетті болашақ үшін» сайлауалды бағдарламасының негізгі бағыттарымен танысты.

Алматы облыстық сайлауалды штабының мүшесі Серік Нұрқадыровтың айтуынша, қоғамдық қабылдау алаңын ұйымдастырудағы негізгі мақсат – тұрғындардың пікірін тікелей тыңдау.

«Бүгін жағалауда тұрғындар алдын ала жазылмай-ақ келіп, өз пікірін ашық айта алатын қоғамдық қабылдау алаңын ұйымдастырдық. Мұнда абаттандыру мен инфрақұрылымнан бастап, әлеуметтік салаға дейінгі түрлі мәселелер бойынша ұсыныс-тілектерді жинап жатырмыз. Барлық өтініш тіркеліп, зерделенеді. Біз үшін тұрғындардың ұсынысы жай сөз күйінде қалмай, жүйеленіп, алдағы жұмыста ескерілуі маңызды», – деді Серік Нұрқадыров.

Жағалаудағы шоу қоғамдық қабылдау алаңына да көпшіліктің назарын аударды. Демалуға келген тұрғындардың бірқатары әуе шары мен флайборд-шоуды көріп, алаңға арнайы келіп, партия өкілдерімен пікірлесті.

Қонаев тұрғыны Григорий Мерисов та шараға алыстан көрінген әуе шарына қызығып келгенін айтады.

«Жағалауда демалып жүргенде алыстан үлкен әуе шарын көрдік. Қызығып, жақындап келсек, мұнда шоу өтіп, қоғамдық қабылдау алаңы жұмыс істеп жатыр екен. Әсіресе флайбордшы қыздың өнері ұнады. Осы мүмкіндікті пайдаланып, өз ұсынысымды да қалдырдым. Қонаев өсіп келе жатқан қала. Сондықтан қаламызда жеке театр ғимараты ашылса деген тілегімді айттым. Мұндай мәдени орын ересектерге де, жастар мен балаларға да қажет деп ойлаймын», – деді Григорий Мерисов.

Қоғамдық қабылдау барысында тұрғындардан түскен ұсыныс-тілектер мен өтініштер жинақталып, алдағы уақытта зерделенбек.

Қапшағай су қоймасының жағалауындағы шара «Әділет» партиясының сайлауалды науқаны аясында ұйымдастырылды.