Қоқыс толы лас үй: Атырауда екі бүлдіршін адам төзгісіз пәтерде тұрып келген

АЛМАТЫ, 23 қазан - Sputnik. Атырауда ерлі-зайыпты мен екі қызы қоқысқа толған үйде тұрып жатыр. Жағдайға қатысты әкімдік түсініктеме берді, деп хабарлайды Sputnik Қазақстан тілшісі.

Атырау қаласы 5 мөлтек ауданындағы 16 үйдің тұрғындары пәтерден шыққан сасық иіс пен антисанитариялық жағдайға бірнеше рет шағымданған.

"Пәтерді тексергенде антисанитарлық жағдай анықталды. Онда ерлі-зайыпты мен екі бүлдіршін қызы тұратын болып шықты. Отбасы әлеуметтік тұрғыдан қолдауды қажет етеді. 22 қазанда полиция басқармасының шақыртуымен "Арнаулы автобаза" серіктестігінің қызметкерлері пәтерді қоқыстан тазарту жұмыстарын жүргізді", - дейді қалалық әкімдік.

Қаласы әкімдігіне қарасты Отбасын қолдау орталығының мамандары отбасын уақытша "Өмірлік қиын жағдайдағы адамдарды қайта әлеуметтендіру орталығына" орналастырылды.

"Кәмелет жасына толмаған 2 және 5 жастағы балалар қауіпсіздік мақсатында тиісті мекемелерге орналастырылды. Балалар орналастырылған мекеме "Сәбилер үйі" және облыстық кәмелетке толмағандарды бейімдеу орталығы", - дейді ведомство.

Қазіргі уақытта отбасы мамандардың бақылауында, қажетті әлеуметтік және психологиялық көмек көрсетіліп жатыр.