Қорғаныс министрлігі алғашқы әскери дайындық пәніне қатысты өзгерісті түсіндірді

АСТАНА, 26 тамыз – Sputnik. Қорғаныс министрлігі мектептерде бастапқы әскери дайындық пәні жаңа бағдарлама бойынша оқытылатынын мәлімдеді, деп хабарлайды Sputnik Қазақстан министрліктің ресми сайтына сілтеме жасап.

Педагогтердің әскери тәжірибесі болуға тиіс

Әскери білім және ғылым департаменті бастығының орынбасары, майор Людмила Перякинаның айтуынша, 1 қыркүйектен бастап пән қайтадан "Бастапқы әскери дайындық" деп аталады. Сонымен қатар оны оқыту форматы түбегейлі өзгереді.

"Бұл өзгерістер пәннің мазмұнына және педагогтерді даярлау тәсілдеріне де қатысты. Енді оқытушылардың біліктілігін арттыру әскери оқу орындарында ұйымдастырылады. Бұл олардың практикалық даярлығын күшейтуге мүмкіндік береді. Бұдан бөлек, заңнамада педагогтердің әскери өтілі болуы да қарастырылған", – деді Перякина.

Балаларды қалай оқытады?

Жаңа бағдарламада оқу үдерісін цифрландыруға басымдық беріледі. Осыған байланысты педагогтер оқу құралдары мен ситуациялық тапсырмаларды әзірлеу кезінде жасанды интеллект мүмкіндіктерін кеңінен пайдалануды үйреніп жатыр.

Бастапқы әскери дайындық педагогтерінің біліктілігін арттырудың басқа да бағыттары бар:

бастапқы әскери дайындық сабақтарында ұшқышсыз басқарылатын құрылғылар технологияларын оқыту;

қосымша білім беру жүйесінде жастардың әскери қызметке дейінгі даярлығын ұйымдастырудың заманауи тәсілдері;

әскери-спорттық және әскери-қолданбалы жарыстарды білім беру үдерісінде тиімді пайдалану.

Айта кетері, бұған дейін Қазақстан Қарулы күштерінің Әскери-патриоттық орталығында бастапқы әскери дайындық оқулығының жаңартылған жобасы таныстырылған болатын.