Қостанай әуежайында ұшақтан өрт шықты

Оқиға Қостанай әуежайында Астанаға бағыт алған Qazaq Air әуе компаниясының ұшағы ұшу жолағында жылдамдық алған сәтте болған, – деп хабарлайды Aikyn.kz сайты.

Алдын ала мәлімет бойынша, ұшақ ұшу-қону жолағымен қозғалған кезде шассидің дөңгелегі тұтанып, экипаж ұшуды тоқтату туралы шешім қабылдаған.

Бортта жолаушылар болған, олардың арасында Оңтүстік-Шығыс Азия елдеріне транзитпен бара жатқан Қорған қаласынан келген туристер тобы да отырған. Бұл туралы ұшақ бортында болған URA.RU журналисі хабарлады.

«Ұшақ ұшуға жылдамдық жинай бастағанда кенет тежеліп қалды. Мен дәл сол дөңгелектің жанында отырдым, тежеген сәтте ұшқын шықты да, дөңгелек лезде отқа оранды», – деді URA.RU журналисі.

Куәгерлердің айтуынша, ұшақ тежелген сәтте қанатының астынан ұшқын шыққан, ол дөңгелектің тұтануына себеп болған.

«Ұшақта техникалық ақау анықталды, осыған байланысты ұшу процесі тоқтатылды. Кейбір жолаушылар шасси маңынан қысқа мерзімді жарқыл байқағанын айтты – бұл жағдай техникалық тексеріс кезінде ескеріледі. Qazaq Air техникалық тобы Қостанай әуежайына аттандырылып, тексеріс пен жөндеу жұмыстарын жүргізеді», – деп мәлімдеді компанияның баспасөз қызметі.

Барлық жолаушылар аман-есен эвакуацияланды, зардап шеккендер жоқ.

Астанаға ұшу кейінге қалдырылды. Туристерге сапар бағытын қайта құруға тура келген. Қазақстан астанасына басқа рейстерге билет болмағандықтан, Вьетнам мен Қытайға транзитпен бара жатқан ресейлік туристер жаңа билеттерді Алматы арқылы сатып алуға мәжбүр болған. Куәгердің айтуынша, соның салдарынан олар екі күн демалысын және біраз қаражатын жоғалтқан.