Құлсары қайта түлейді

Моноқалада ескі саябақтар жаңартылып, жаңа аллеялар ашылып жатыр. Бұдан бөлек 30 аула абаттандырылып, тұрғындарға қолайлы жағдай жасалмақ.

Құлсарыдағы «Нұрсая» саябағының салынғанына 10 жылдан асты. Әбден ескірген демалыс орнында қазір құрылыс жұмыстары қызу. Одан қалды тағы  екі саябақ қалпына келтіріліп, жаңадан үш гүлзар салынып жатыр. 

Жанболат Ибрашев, мердігер мекеме өкілі:

- Тоқ жүргізіп жатырмыз. Су жүргізіп жатырмыз. Мына жағымыздағы үйлерден бері қарай 5-6 метрдей жерде асфальт болады. Сосын брусчаткалар салынады, балалар отыратын, кісілер демалатын саябақ болады. Жан-жағында жарық болады.

Қалада жаңадан орталық алаң пайда болады. Қазір жобалық-сметалық құжаттары тиісті сараптамадан өткен. Жоба 1,5 млрд теңгеге бағаланған. 

Қадыржан Әдинов, Құлсары қаласының әкімі:

- Қала бойынша 30 ауланың абаттандыру жұмыстары жүргізіліп жатыр. Аулаларда жарықшамдар қондыру, демалыс орындарын қалыптастыру, аулаішілік асфальттарды жаңарту, сонымен қатар балалар және спорт алаңдарын салу кіреді. Жұмыстар жоспарға сәйкес жүргізіліп жатыр. Үстіміздегі жылы толық аяқталады деп күтілуде.

Ал жаяу жүргіншілер мен веложол келер жылы салынады. 280 көшеге жарық тартылады. Тұрғындардың өтініші бойынша жаңадан 60 аялдама орнатылады.

Авторлары: Асланбек Шығыр, Айбек Байзақов, Жандос Рахметуллин