Құны 1 млрд теңгеден асады: Шымкентте қорғаныс мақсатындағы жер жеке меншікке өтіп кеткен

АСТАНА, 17 маусым – Sputnik. Қорғаныс мақсатындағы құны 1 миллиард теңгеден асатын жер учаскесі мемлекетке қайтарылды, деп хабарлайды Бас әскери прокуратура.

Шымкент гарнизонының әскери прокуратурасы Ұлттық ұлан әскери бөлімдерінің біріне тиесілі жер теліміне қатысты заң бұзушылықты анықтады.

"Жалпы аумағы 87 гектардан асатын жер учаскесі 1999 жылы заңсыз түрде жеке меншік құрылымдардың пайдасына берілген, кейіннен бірнеше рет қайта сатылған", - дейді прокуратура.

Гарнизон прокуратурасы әскери бөліммен бірлесіп, сот арқылы сатып алу-сату шарттары жарамсыз деп тануға қол жеткізді.

Нәтижесінде құны 1 миллиард теңгеден асатын жер учаскесі мемлекет меншігіне қайтарылып, әскери ведомствоның меншігіне берілді.