Құрылтай сайлауы: партиялар Ұлттық теледебатта өз ұстанымын айтты

Партиялардың сөз сөйлеу кезегі жеребе арқылы анықталды, – деп хабарлайды Aikyn.kz сайты.

Құрылтай сайлауына қатысатын партиялар пікірсайысы – Ұлттық теледебат басталды. Бірінші кезеңдегі сөйлеу кезегі жеребе арқылы анықталды. Ол үшін арнайы цифрлық «рандомайзер» жүйесі қолданылды.

Партиялардың сөз сөйлеу реттілігі төмендегідей:

1. «Ауыл» партиясы
2. «Байтақ» партиясы
3. ӘDILET партиясы
4. Жалпыұлттық социал-демократиялық партиясы
5. «Ақ жол» демократиялық партиясы
6. Respublica партиясы
7. Қазақстан Халық партиясы

Теледебаттың І кезеңі басталды. Бұл бөлімде әр партияға өз бағдарламасының негізгі басымдықтарын таныстырып, Құрылтай сайлауына қатысудағы мақсаты мен сайлаушыларға ұсынатын бастамаларын баяндауға мүмкіндік беріледі.

Жеребе қорытындысы бойынша таныстыру кезеңін бірінші болып «Ауыл» партиясы бастады.

«Біз ұстанымымызды нақты істермен дәлелдедік. Құрылтайға жан-жақты есептелген нақты бағдарламамен келіп отырмыз. Ауыл көркейсе, ел де өркендейді. Күшті мемлекет мықты өңірлерден, ең алдымен ауылдан басталады», – деді «Ауыл» партиясы төрағасының бірінші орынбасары Серік Егізбаев.

«Байтақ» партиясы атынан Нұргүл Жұмахметқызы Қадырбаева «Ұлттық теледебат – 2026» саяси пікірсайысында сөз сөйледі

«Байтақ» партиясы атынан саяси кеңес мүшесі Нұргүл Жұмахметқызы Қадырбаева партияның ұстанымын таныстырды.

Нұргүл Жұмахметқызы экология мәселесіне ерекше тоқталып, Арал өңірінің тағдырына алаңдайтынын айтты. Сондай-ақ қоршаған ортаны қорғаумен қатар, адам капиталы, рухани құндылықтар мен ұрпақ тәрбиесінің маңызын атап өтті.

ӘDILET партиясы басқарушылар тобы мен саяси кеңесінің мүшесі Ренат Бектұров білімді қоғам қуатты мемлекет құра алатынына тоқталды.

«Алдағы 5 жылда елімізде мектептерде 300 мың, балабақшаларда 79 мың жаңа оқу орындарын ашамыз деп өзімізге міндет алып отырмыз», - деді ол.

ЖСДП атынан Тазабек Сәмбетбай Дәкенайұлы сөйледі.

«Партиямыздың ұраны – өзіміз бақылаймыз, қадағалаймыз. Ел еншісіндегі әрбір тиынды, әрбір бюджеттегі қаржыны үлкен көзәйнекпен жіті қадағалаймыз. ЖСДП өз алдына жемқорлықты, кедейлікті, қымбатшылықты, әділетсіздікті жою міндеттемесін алады», – деді партия төрағасының орынбасары.

«Ақ жол» демократиялық партиясы саяси кеңесінің мүшесі Олжас Елтайұлы Нұралдинов партияның ұстанымын таныстырды.

Олжас Елтайұлы Қазақстанның басты байлығы табиғи ресурстар емес, адам капиталы екенін атап өтті. Сондай-ақ шетелдік жер қойнауын пайдаланушылардың келісімшарттарын ұлттық мүддеге сай қайта қарау, шағын және орта бизнесті қолдау, отандық өндірісті, цифрландыру мен жасанды интеллектіні дамыту, сондай-ақ білім беру мен денсаулық сақтау салаларын жетілдіру қажеттігін айтты.

Respublica партиясы атынан Екатерина Смолякова «Ұлттық теледебат – 2026» саяси пікірсайысында сөз сөйледі. Екатерина Сергейқызы теледебат алаңында партияның ұстанымын таныстырды. Ол адам капиталына тоқталып, білім алу, адал еңбек және кәсіпкерлікті дамыту жайында айтты.

Ұлттық дебатқа қатысушылар арасындағы ең жас үміткер, Қазақстан Халық партиясының өкілі Сұңқар Ислам елімізде адамның болашағы оның еңбегі мен біліміне байланысты екенін айтты.

«Жастарға мүмкіндік берсек, Қазақстанның болашағын айқындаймыз. Себебі бүгін қабылданатын шешімдеріміз еліміздің ертеңіне тікелей әсер етеді», - деді ол.