Құтқарушылар қызметінің сапасы артты

Енді құтқарушылар, дәрігерлер мен тәртіп сақшылары бірлесіп қызмет етеді. Осылайша, өртке қарсы қызмет, жедел медициналық жәрдем және полиция бөлімшелері бір аумақта орналасады.

Қазақстандағы алғашқы әмбебап жедел қызметтер кешенінің екеуі Шымкент қаласында іске қосылды. Ал үшінші бөлімше таяуда пайдалануға берілмек. 

Айнұр Қуатқызы, тілші:

- Бүгін біз бас қаладағы өрт сөндіру бөлімдерінің біріндеміз. Қазір құтқарушылармен шұғыл шақыртуға шықтық. Жалпы ел бойынша күн сайын отыз мыңнан астам құтқарушы қызметке кірісіп, ел азаматтарының қауіпсіздігін қамтамасыз етеді.

Біз түсірілімге келген бойда бөлімше құтқарушылары қаладағы мейрамханалардың бірінде шыққан өртті сөндіруге аттандық. Оқиға орнына дереу жеткен жасақ қызыл жалынды әп-сәтте ауыздықтады. Жалпы жыл сайын құтқарушылар мұндай 90 мыңнан астам төтенше жағдайдың алдын алып, ондаған мың адамға көмек көрсетеді. Бұл ғана емес, төтеншеліктер шалғай елді мекендегі ағайынның да қауіпсіздігін қамтамасыз ететін болды. Бұрындары көмек кеш жететін ауылда заманауи ерікті өрт сөндіру бекеттері ашылған.

Елдос Зияда ҚР ТЖМ өртке қарсы қызмет комитетінің бас маманы:

- Алғаш рет министрдің бастамасымен өртке қарсы қызметі жоқ елді мекендерде «ауыл құтқарушылары» бағдарламасы бар. Ол –  жергілікті атқарушы органдармен бірлесе отырып, ауылдарда өрт деполарын ашу болып табылады. Қазірде 134 өрт сөндіру бекеттері ашылды. Ары қарай бұл жұмыс жалғасады.

Бүгінде қауіпсіздікті арттыру мақсатында салаға жаңа технологиялар енгізіліп жатыр. Орман алқаптары мен қауіпті аймақтарда бейнебақылау камералары орнатылған. Осылайша, өртті ерте анықтауға мүмкіндік бар. Қазір «Ертіс», «Семей орманы», «Бурабай», «Медеу» және басқа да өңірлерде жұмыс істеп тұр.

Дидар Қажкенов, ҚР ТЖМ Төтенше жағдайларды жою департаментінің бас маманы:

- Елімізде жедел-құтқару жасағаның 20 бөлімшесі бар. Оның негізгі міндеті – су, құрылықта, су астында, таулы аймақтарда және қауіпті жерлерде құтқару жұмыстарын жүргізу. Елімізде туризм саласын дамытуға байланысты елімізде жеті құтқару бөлімшесі ашылды. Солтүстік Қазақстанда төрт бөлімшесі, Ақмолада екі құтқару, Алматы қаласында бір құтқару бөлімшесі ашылды. 2028 жылға дейін сегіз құтқару бөлімшесі ашылмақ.

Соңғы екі жылда Төтенше жағдайлар министрлігі техникаларын жаңарта бастады. Төрт ұшақпен қатар алты тікұшақ сатып алған. Мұның өзі құтқару жұмыстарын әлдеқайда жеделдете түскен.

Авторлары: Айнұр Қуатқызы, Самат Қазанбаев