Құжатсыз жұмыс істеген Toyota Alphard арнайы тұраққа жөнелтілді

Toyota Alphard жүргізушісі Түркістаннан Шымкентке жолаушылар тасымалдаған, алайда бұл сапар айыптұрақпен аяқталды. Полицейлер көлік ішіндегі адамдардың жолай ергендер емес екенін анықтады: ер адам тиісті құжаттарсыз жолаушылар тасымалымен айналысқан, деп хабарлайды Tengri Auto Polisia.kz-ке сілтеме жасап.

Сапардың коммерциялық сипатын растауға жолаушылардың өзі көмектескен көрінеді, олар жолақысын төлегендерін айтқан.

Тексеруден кейін жүргізушіге қатысты әкімшілік хаттама толтырылып, Toyota Alphard арнайы айыптұраққа жөнелтілді.

Ер адамда қандай рұқсат құжаттар болмағаны нақтыланбады.

Бұл жағдай минивэндермен қалааралық тасымалға бақылау күшейген тұста болып отыр. Бұған дейін көлік инспекторлары қалааралық сапарда жиі қолданылатын Toyota Alphard, Estima және басқа да оң рөлді көліктерді тексерген болатын.

Тасымалдаушыға қандай құжаттар қажет?

Қазақстанның "Автомобиль көлігі туралы" заңына және Жолаушылар мен жүк тасымалдау қағидаларына сәйкес, автобустармен және шағын автобустармен жолаушыларды коммерциялық тасымалдау тек белгіленген талаптар сақталған жағдайда жүзеге асырылуы тиіс.

Заңды жұмыс істеу үшін тасымалдаушыда мыналар болуы тиіс:

көлік құралының құжаттары және қолданыстағы міндетті сақтандыру полисі; тиісті санаттағы жүргізуші куәлігі; автобустармен және шағын автобустармен тасымалдау кезінде тиісті қызмет түріне берілген лицензия қосымшасында көрсетілген көлік құралы;; жүргізушінің рейске дейінгі медициналық тексеруден және көлік құралының техникалық байқаудан өткені туралы белгілері бар борт журналы;.

Сонымен қатар жолаушыларды тұрақсыз тасымалдау жеке немесе заңды тұлғалардың тапсырысы бойынша шарттық негізде жүзеге асырылады. Оларға туристік, экскурсиялық, тапсырыстық және бір реттік сапарлар жатады.

Маңызды: жолаушыларды заңсыз тасымалдау әкімшілік жауапкершілікке әкеп соғады.

Оң рөлді көліктерге тыйым салына ма?

Еске сала кетейік, бұған дейін өнеркәсіп және құрылыс министрі Ерсайын Нағаспаев қалааралық тасымалда оң рөлді көліктерді пайдалану мәселесіне қатысты пікір білдіре отырып, мұндай машиналарды Қазақстанға әкелуге 2007 жылдан бері тыйым салынғанын және оны тек бақылауда ұстау қажет екенін мәлімдеді.

Бұл ретте ол жол қозғалысы қауіпсіздігі мәселелері ІІМ құзыретінде екенін, сондықтан жолаушылар тасымалында қолданылатын оң рөлді көліктерге қатысты қосымша шектеу бойынша шешімді осы министрлік қабылдауы тиіс екенін атап өтті.

Айта кету керек, заң бойынша такси тасымалы үшін рөлі оң жақта орналасқан автокөлік құралдарын пайдалануға тыйым салынады.

Alphard бойынша тексерістер

Бір ай бұрын Автомобиль көлігі және көліктік бақылау комитеті жолаушылар тасымалы қауіпсіздігін бақылау бойынша рейд жүргізген болатын.

Жолда оң рөлді көліктерге, соның ішінде Toyota Alphard, Toyota Estima және басқа да ұқсас модельдерге ерекше назар аударылды.

Оң рөлді көліктер Toyota Alphard қатысуымен болған бірқатар ірі жол апатынан кейін бақылауға алынды.

Былтыр күзде екі ірі апат болды. 30 қыркүйекте Алматы - Бішкек тасжолында Toyota Alphard көлігінің қатысуымен болған жол апатында сегіз адам қаза тапса, бірнеше күннен кейін, 3 қазанда Павлодар маңында тағы екі адам апат құрбаны болды. Онда минивэн жылқымен соқтығысып, аударылып қалған болатын.

Тағы оқыңыз: Қазақстанда рөлі оң жақтағы көліктерге тыйым салу керек пе?

Google News арқылы жаңалықтарымызды қадағалаңыз

Жазылу