Қырғызстанда құтқарушылардың неліктен Наговицинаның денесіне көтеріле алмай жатқаны айтылды

Қырғызстандағы Жеңіс шыңында қаза тапқан ресейлік альпинист Наталья Наговицинаның денесін алып түсу үшін құтқарушылардың қауіпсіздігіне толық кепілдік берілмейінше, олар тауға шыға алмайды. Бұл туралы РИА Новости Қырғызстан Төтенше жағдайлар министрлігінің баспасөз қызметіне сілтеме жасап хабарлады, деп жазады Tengri Travel.

Ведомствоның түсіндіруінше, қайғылы оқиға болған жерде ауа райы санаулы минуттарда өзгеріп кетуі мүмкін. Бұл жағдай тауға көтерілуге, оның ішінде тергеу және құтқару іс-шараларын жүргізуге қолайсыздық тудырады.

"Жұмысты жүргізу туралы шешім мамандардың өмірі мен денсаулығына төнетін қауіп-қатерді міндетті түрде бағалау арқылы қабылданады. Төтенше жағдайлар министрлігі операцияның қауіпсіздігіне жеткілікті кепілдік болмаған жағдайда құтқарушыларды аттандыра алмайды", - деді ведомство өкілі.

Сонымен қатар ол альпинистің денесін эвакуациялау үшін тек ауа райының қолайлы болуы жеткіліксіз екенін атап өтті.

Министрлік жеті мың метрден астам биіктіктен мәйітті алып түсу үшін тек ауа райының түзелуі аздық ететінін жеткізді. Құтқару жұмыстары үшін қажетті техника мен альпинистердің арнайы дайындығы болуы шарт.

Сондай-ақ ведомство Қырғызстанда жеті мың метрден жоғары биіктікке көтеріле алатын авиациялық техниканың жоқтығын түсіндірді. ТЖМ иелігіндегі Airbus H-125 тікұшағы теңіз деңгейінен 7010 метрге дейінгі биіктікке қона алады, ал Наговицинаның денесі шамамен 7102 метр биіктікте жатыр.

"Осылайша, Қырғыз Республикасы ТЖМ иелігіндегі Airbus H-125 тікұшағымен альпинист жатқан биіктікке тікелей қону техникалық тұрғыдан мүмкін емес", - деп түйіндеді ведомство.

Наталья Наговицына 2025 жылғы 12 тамызда Тянь-Шаньның ең биік нүктесі – Жеңіс шыңынан түсу кезінде, теңіз деңгейінен шамамен 7,2 мың метр биіктікте аяғынан жарақат алған болатын.

Бастапқыда оны зембілмен тасымалдаған, бірақ кейін көмек келгенше шыдауы үшін жылы киім және азық-түлік қорымен таудағы шатырда қалдырған. Ресейлік әйелді басқа альпинистер бірнеше рет құтқармақ болды, алайда ауа райының қиындығына байланысты ол мүмкін болмаған. Тіпті олардың бірі – италиялық Лука Синигалья қаза тапты.

Былтыр тамыз соңында құтқару жұмыстары тоқтатылды. Наговицына ресми түрде хабар-ошарсыз кеткендер тізіміне енді. Натальяның шатырда өлер алдындағы хатын қалдыруы мүмкін деген болжам бар.

Биыл да Наговицынаның денесін табу мүмкін болмайды, себебі Жеңіс шыңына шығу маусымы қазірдің өзінде жабық.

Бұған дейін Ресей альпинизм федерациясының классикалық альпинизм комитетінің басшысы Александр Яковенко альпинистік тәжірибе тарихында Жеңіс шыңының ең күрделі учаскелерінен адамдарды эвакуациялау сәтті аяқталған жағдайлар болмағанын айтқан еді. Дегенмен, мамандар Наговицынаның денесін алып шығу үшін қолдан келгеннің бәрін жасайды.

Google News арқылы жаңалықтарымызды қадағалаңыз