Оған ешқандай жеңілдік жасалмаған: Бишімбаевтың түрмеде жазасын қалай өтеп жатқаны айтылды

Ішкі істер министрінің орынбасары – Қылмыстық-атқару жүйесі комитетінің (ҚАЖК) төрағасы Абай Қайырбеков бұрынғы Ұлттық экономика министрі Қуандық Бишімбаевтың жазасын қалай өтеп жатқанын айтты, – деп хабарлайды Аikyn.kz

Оның айтуынша, Бишімбаев жазасын басқа сотталғандармен бірдей жағдайда өтеп жатыр.

«Бишімбаев қылмыстық-атқару заңнамасының барлық талаптарына сәйкес, басқа сотталғандармен тең жағдайда жазасын өтеп жатыр. Сотталғандарды жұмыспен қамту мәселелері жеке дерек болып саналады. Ондай ақпарат тек туыстарына мен адвокаттарына ғана беріледі. Жалпы айтар болсам, біздің мекемелерде сотталғандардың шамамен жартысы еңбекпен қамтылған. Биыл біз жұмыс істеп жүрген сотталғанның саны 3 мыңға жетті», – деді ол. 

Сондай-ақ журналистер бұрынғы министрдің жалғыз камерада отырған-отырмағанын сұрады.

«Айтқанымдай, ол жалпы негізде, басқа сотталғандармен бірге жазасын өтеп жатыр. Сотталғанға ешқандай ерекше жағдай, жеңілдік немесе арнайы талаптар қарастырылмаған», – деді Абай Қайырбеков.