Қытай экономикасы 2026 жылдың бірінші тоқсанында 5% ға өсті

2026 жылдың қаңтар-наурыз айларында Қытай экономикасы 5% өсім көрсетті.
Бұл туралы ҚХР Ұлттық статистика бюросы деректеріне сүйенген Жэньминь жибао хабарлады.

Алдын ала есеп бойынша, елдің жалпы ішкі өнімі 33,4 трлн юаньға жеткен. Нақты мәнде бұл өткен жылдың сәйкес кезеңімен салыстырғанда 5%-дық өсімді білдіреді.

Экономикалық серпін бірқатар негізгі салалардың оң нәтижесіне байланысты қалыптасты. Атап айтқанда, өнеркәсіп өндірісі 6,1%-ға артса, бөлшек сауда көлемі 2,4%-ға өсті. Негізгі капиталға инвестициялар 1,7%-ға ұлғайып, сыртқы сауда айналымы 15%-ға дейін кеңейді. Қалалардағы жұмыссыздық деңгейі орта есеппен 5,3% болды.

Associated Press мәліметінше, бұл көрсеткіштер сарапшылар күткен деңгейден жоғары. Сондай-ақ өсім өткен жылдың соңғы тоқсанындағы 4,5%-бен салыстырғанда жеделдеген.

Экономикалық өсім геосаяси шиеленістерге қарамастан тіркелді. Сарапшылар қысқа мерзімде Қытай экономикасы мұндай сыртқы факторларға төтеп бере алатынын айтады. Дегенмен, энергия бағасының қымбаттауы инфляциялық қысымды күшейтуі мүмкін.

Ұзақ мерзімді перспективада тәуекелдер сақталып отыр. Әсіресе, жаһандық сұраныстың әлсіреуі экспортқа кері әсер етуі ықтимал. Халықаралық валюта қоры 2026 жылға арналған өсім болжамын 4,4%-ға дейін төмендетті.

Айта кетейік, Қытай билігі биыл экономиканы 4,5-5% деңгейінде өсіруді жоспарлаған.