Қытай теңіз ортасынан 6 шақырымдық арал салды

Қытай Оңтүстік Қытай теңізіндегі Парасель архипелагында жаңа жасанды арал салудың негізгі кезеңін аяқтады. Спутниктік суреттерді талдаған сарапшылардың мәліметінше, бұрын су астында жатқан риф небәрі 10 айда ірі құрлық аумағына айналған.

Жаңадан қалыптасқан аумақтың көлемі шамамен 600 гектар, ұзындығы 6 шақырымға жуық. Сарапшылар оның Қытайдың Оңтүстік Қытай теңізіндегі ең ірі нысандарының біріне айналуы мүмкін екенін айтады.

Аралда ұзындығы 680 метрлік айлақ салынған. Рифтің лагунасы ірі кемелерді қабылдай алатын терең су айлағына айналдырылып жатыр. Спутниктік суреттерден 50-ден астам ғимарат, тікұшақ алаңы, ірі нысанның іргетасы, бетон зауыты мен жылжымалы электр станциялары да байқалған.

Сарапшылар аралдың солтүстік-батысындағы үш шақырымнан астам түзу жағалау бөлігінде ірі әскери ұшақтарды қабылдайтын ұшу-қону жолағын салуға мүмкіндік бар екенін атап өтті.

CSIS және Lowy Institute сарапшыларының бағалауынша, бұл Қытайдың 2017 жылдан бері Оңтүстік Қытай теңізінде аралдарды кеңейту жұмыстарын қайтадан ауқымды түрде қолға алғанын көрсетеді.

Әскери сарапшылар жаңа нысанның стратегиялық маңызы жоғары екенін айтады. Ол Қытайдың аймақтағы бақылау мүмкіндігін арттырып, Тайвань маңында жағдай шиеленіскен жағдайда әуе қорғанысы, радиоэлектрондық күрес және радиолокациялық жүйелердің әрекет ету аумағын кеңейтуі мүмкін.