Қызылорданың футбол клубы жеке басқаруға өтсе де неге мемлекеттен қаржыландырылады

2019 жылы «Қайсарға» облыстық бюджеттен 4 млрд теңге бөлінді. Сол кезең үшін бұл — облыстар арасындағы ең көп қаржы.

— 2020 жылы облыстық бюджеттен 2,6 млрд теңге бөлініп, 2021 жылы клуб құрамына 9 легионер алынды. Алайда бәсекелестіктің жоғары болуынан және футболшылардың кәсіби деңгейінің төмендігінен жергілікті команда чемпионатта 19 ұпай еншілеп, турнирлік кестеде 13-орында болып, Бірінші лигаға төмендеді. 
2022 жылы Нұрлыбек Машбекұлы облысқа басшы болып келгеннен кейін жергілікті командаға Премьер-лигаға өтуге тиіс талаптар қойылды. Сол жылы бөлінген 605 млн теңгемен жергілікті команда Бірінші лигада ойнап жүрген болатын. 2023 жылы аталған клубқа облыстық бюджеттен 1,2 млрд теңге бөлініп, дұрыс жоспардың, қойылған тиісті талаптардың нәтижесінде жергілікті команда Бірінші лигадан Премьер лигаға өтті. 2024-2025 жылдар аралығында команда облыстық бюджеттің 1,2 млрд теңгесі есебінен жасыл алаңда өнер көрсетті, — деді облыс әкімінің орынбасары Мейрамбек Шермағанбет.

Облыс әкімінің орынбасары жергілікті футбол клубы жеке басқаруға берілсе де мемлекеттен қаржыландыру неліктен тоқтамағанын түсіндірді.

— «Қайсар» футбол клубының 2020 жылдан бастап қалыптасқан 753 млн теңге көлемінде берешегі бар болатын. Қазіргі кезге дейін клуб берешегінің жартысы жабылды. Президент тапсырмасына сәйкес елімізде алғашқылардың бірі болып қызылордалық «Қайсар» футбол клубы 2025 жылдың соңында жеке басқаруға өтті. Клубтың жаңа иесі — «TAU Group LTD» компаниясының басшысы, жерлесіміз Исламғали Қозыбақов. Биылғы жылдан бастап жергілікті клуб жеке кәсіпкердің басқаруына берілді. Алдағы 5 жылда «Қайсар» футбол клубына облыстық бюджеттен белгілі бір көлемде қаржы қарастырылады. Осы уақыт аралығында қаржы көлемі кезең-кезеңімен азайып, бес жылдан кейін облыстық бюджеттен қаржыландыру толық тоқтатылады. Биыл жергілікті клубқа бөлінген қаржы 200 млн теңгеге дейін қысқартылды. Биыл жергілікті «Қайсар» футбол клубына облыстық бюджеттен бөлінген 995 млн теңгеге мемлекеттік сатып алу заңына сәйкес конкурс өткізіліп, жеңімпаз атанған «TAU Group LTD» компаниясына қаржы бөлінді, — деді Мейрамбек Шермағанбет.

Жеке басқаруға берілгеннің тиімділігі жоқ емес. Қазіргі таңда инвестор 18 млрд теңгеге «Қайсар» академиясын салып жатыр. Биыл күзде негізгі база мен жаттығатын 3 алаңның құрылысы аяқталады. Кешен 2027 жылдың соңына дейін толығымен пайдалануға берілмек. Жергілікті әкімдік жоба клубтың ұзақ мерзімді дамуына бағытталған негізгі инвестиция көзі екенін алға тартты.

— Жалпы клубтың стратегиясы 5-10 жылдық жүйелі өсімге бағытталған. Жоба аясында 7 толық өлшемді және 2 балалар алаңының құрылысы, сонымен қатар жабық манеж бен ойыншыларды қалпына келтіруге арналған медициналық орталық қарастырылған. Академияда тәрбиеленген спортшылар болашақта жергілікті «Қайсар» футбол клубын биік шыңнан көрсетеді деп нық сеніммен айта аламыз. Екіншіден, жаңа стадионды күтіп ұстау шығынының жылдық көлемі — 500 млн теңге. Бұл — жеке инвестордың қаражаты, бюджеттен оған ешқандай қаржы бөлінбеген. Үшіншіден, шет мемлекеттерден келетін жалдамалы ойыншылардың (легионерлер) шығындарын негізінен жеке инвестор өзі өтеп отыр. Стадионның сапасы және архитектуралық келбеті заманауи талаптарға сай. Басқа өңірлердегі «Қайсар Арена» секілді стадиондардың шығыны шамамен 600 млн теңгеден жоғары. Жаңа стадион сияқты заманауи нысандардың барлығы әлеуметтік салалардан талан-таражға түсіп жатқан қаржыны тоқтату нәтижесінде үнемделген, қайтарылған қаражат есебінен салынған, — деді облыс әкімінің орынбасары. 

Еске салайық, Түркістан облысының Қаржы және мемлекеттік активтер басқармасы таяуда «Тұран» футбол клубын электронды саудаға шығарды.