Әскерге кеткен азаматтардың кредиттері бойынша төлемдер автоматты түрде тоқтатылады

Қаржы нарығын реттеу және дамыту агенттігі осы жеңілдікті алу тәртібі мен маңызды талаптар туралы мәлімдеді, – деп хабарлайды Aikyn.kz.

Агенттік мерзімді әскери қызметке шақырылған азаматтарға банктік қарыздар мен микрокредиттер бойынша төлемді кейінге қалдыру тәртібі туралы еске салады.

Төлемді кейінге қалдыру мерзімді қызметтің барлық кезеңіне және ол аяқталғаннан кейін тағы  күнтізбелік 60 күнге автоматты түрде беріледі.

Төлемдік кейінге қалдыру кезеңінде негізгі борыш пен сыйақы бойынша төлемдер тоқтатыла тұрады. Бұл ретте кейінге қалдыру кезеңі үшін сыйақы есептелмейді.

Банкке немесе микроқаржы ұйымына (МҚҰ) жеке жүгіну, өтініш беру, әскери комиссариаттан анықтама беру не кредиттік шартқа қосымша келісімге қол қою талап етілмейді.

Мерзімді қызметке шақыру және одан босату туралы мәліметтер Қорғаныс министрлігінің, кредиттік бюролардың және қаржы ұйымдарының ақпараттық өзара іс-қимылы шеңберінде кредиторларға беріледі.

Төлемді кешіктіру әскерге шақырғанға дейін болса, не істеу керек?

Өндіріп алу рәсімдері басталған берешекке қатысты заңнамада белгіленген жағдайларда мерзімді қызметті өткеру кезеңіне тиісті рәсімдерді тоқтата тұру да көзделген.

Әскери қызмет аяқталғаннан кейін берешек сақталады. Сондықтан әскерге шақырылғанға дейін кредиттік міндеттемелеріңіздің жай-күйін тексеріп, қажет болған жағдайда оларды реттеу бойынша шаралар қабылдау ұсынылады.

Мерзімді қызмет кезінде жаңа кредиттер берілмейді

2025 жылғы 31 тамыздан бастап мерзімді қызметтің әскери қызметшілеріне жаңа банктік қарыздар мен микрокредиттер беруге тыйым салынады. Өтінімді қарау кезінде банк немесе МҚҰ кредиттік бюро арқылы азаматтың мәртебесін тексереді. Кредиттік есепте мерзімді қызметті өткеру туралы ақпарат болған кезде кредитор жаңа қарыз немесе микрокредит бермейді.

Төлемді автоматты түрде кейінге қалдыру тетігі 2024 жылғы тамыз айынан бастап қолданылатынын еске саламыз. «Мемлекеттік кредиттік бюро» АҚ-ның деректері бойынша 2024 жылғы тамыздан бастап 2026 жылғы 1 маусымға дейін жалпы сомасы 23,5 млрд теңгеге қарыздар бойынша мерзімді қызметтің 82,1 мың әскери қызметшісінің төлемдері кейінге қалдырылды.

2026 жылғы бірінші жартыжылдықта 30 мың әскери қызметшінің жалпы сомасы 7,5 млрд теңгеге қарыздары бойынша төлемдері кейінге қалдырылды.

Әскерге шақырар алдында әскери қызметшілерге барлық кредиттік міндеттемелер туралы ақпараттың бар-жоғын және өзектілігін тексеру үшін кредиттік есебін тексеру ұсынылады.

Төлемді кейінге қалдыру берешекті есептен шығаруды білдірмейді. Белгіленген кезең аяқталғаннан кейін кредит бойынша міндеттемелер сақталады және қарыз алушы оларды орындауды жалғастыруы керек.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.