Ұлттық өнер мерекесі

Қазақтың әні мен күйі, жыры мен термесі тоғы­сатын «Біздің жәрмеңке» концерті ұлттық өнердің қадір-қасиетін тағы бір мәрте танытпақ. Республика күніне арналған мерекелік кеште халқымыздың ғасырлар бойы ұрпақтан-ұрпаққа жалғасып келе жатқан музыкалық мұрасы кеңінен насихатталып, дәстүрлі өнердің сан қыры көрерменге ұсынылды.

Концертте қазақтың дәстүрлі ән өнерінің белгілі өкілдері Елмұра Жаңаберген, Айгүл Елшібаева, Клара Төленбаева, Жаслан Кәрім, Толғанбай Сембаев, Перизат Омарбекова және өзге де өнер­паздар сахна төріне шықты. Кеш тізгінін Жасұлан Наурызбайұлы мен Ерлан Рысқали ұстайды. Өнер кешінде ел жадында сақталған, халықтың рухани қазы­насына айналған таңдаулы туындылар шыр­қалды. Атап айтқанда, «Қанекей, тілім, сөйлеші», «Інжу-маржан», «Құдайбергеннің желдірмесі», «Аққу», «Көкаршын», «Сегіз аяқ», «Сандуғаш», «Сарыжайлау» секілді шығармалар орындалады. Ән мен күйге жыр-терме, желдірме және ұлттық би өнері ұласып, мерекелік бағдар­ламаның мазмұнын байыта түсті. Өнерпаздарға Қазақ мемлекеттік «Астана сазы» фольклорлық ансамблі сүйемелдеді.

Көрерменді ерекше әсерге бөлеген қойылым­дардың бірі – төрт өнерпаздың басын қосатын «Тенорлар шеруі». Ал кеш соңында барлық қа­тысушы «Сәлем, Қазақстан» әнін бірге шырқап, мерекелік концертті қорытындылады.

«Біздің жәрмеңке» – ұлттық өнердің өміршең­дігін танытып, төл мәдениетіміздің терең тамырына үңілдіретін рухани мәдени кеш. Ән мен күй арқылы елдік рухты асқақтатып, туған жерге деген сүйіс­пеншілікті ұлықтайтын бұл кештің Республика күні қарсаңында өтуінің де өзіндік мәні бар. Ал рес­публика күніне арналған дөңгелек үстелде ел тарихы мен ұлттық құндылықтар талқыланды.

Сымбат БАУЫРЖАНҚЫЗЫ