Қазақ ұлттық өнер университетінде ғылыми зерттеу лабораториясы ашылды

К.Байсейітова атындағы Қазақ ұлттық өнер университетінде өткен “Ұлы дала музыкасы” атты жыл сайынғы халықаралық ғылыми-тәжірибелік конференция аясында дәулескер домбырашы, ғалым Базаралы Мүптекеев атындағы материалдық емес мәдени мұра ғылыми-зерттеу лабораториясының ашылу салтанаты өтті, – деп хабарлайды Aikyn.kz 

Материалдық емес мәдени мұра ғылыми-зерттеу лабораториясы — қазақ халқының дәстүрлі өнері мен рухани мұрасын ғылыми тұрғыдан зерттеу, сақтауды мақсат ететін орталық. Мұнда музыка, ауыз әдебиеті, салт-дәстүр және фольклорлық деректерді жинақтау, жүйелеу және цифрландыру бағытында кешенді жұмыстар жүргізілмек.

17–19 қазан аралығында өткен конференцияға Қазақстан, Түркия, Ресей және Өзбекстан ғалымдары, этномузыкатанушылар мен фольклортанушылар қатысып, дәстүрлі музыканы сақтау мен насихаттау, заманауи зерттеу әдістері және түркі халықтарының мәдени байланыстары сияқты тақырыптар талқыланды.