С.Сейфуллин атындағы Қазақ агротехникалық университетінде воркаут алаңы ашылды

С.Сейфуллин атындағы Қазақ агротехникалық университетінде студенттерге арналған жаңа воркаут алаңы ашылды.

Жоба «Заң мен тәртіп» бағдарламасы аясында жүзеге асырылып, жастардың қауіпсіз ортада спортпен айналысуына жағдай жасауға бағытталған. Алаңның ашылу салтанатында, спортта жоғары жетістіктерге жеткен студенттер марапатталды.

Даниал Қадырхан 5 жылдан бері джиу-джитсумен айналысады. Бірінші курс студенті халықаралық сайыстарға қатысып, жақсы нәтиже көрсетіп келеді. Жақында Абу-Дабиде өткен әлем чемпионатынан жүлдемен оралды. Ал бүгін спорттағы жетістіктері үшін Сәкен Сейффулин атындағы медальмен марапатталды.

Даниал Қадырхан, С.Сейфуллин атындағы қазақ агротехникалық университетінің 1-курс студенті:

- Воркаут зона біздің балаларымызға өте керек деп ойлаймын. Өйткені біздің әр адам университетіміздің әр адамы уақытын тиімді өткізе алады. Бүгін университет атынан осындай медаль сыйланып отыр. Бұл С.Сейфуллин атындағы медаль. Бұл сыйлық үшін өте қуаныштымын. Алғысым шексіз. Бұл біздің болашақ спортшыларымызды ынталандырады деп ойлаймын. 

Воркаут аймағында көше спортына арналған барлық  құрылғылар орнатылған. Ашық алаң студенттердің бос уақытын тиімді өткізуге және кәсіби спортқа дайындалуына мүмкіндік береді. Бұдан бөлек жатақхана маңында жаңа баскетбол алаңы да ашылды. 

Ержан Айнабеков, "Ұлттық аграрлық ғылыми-білім беру орталығы" Басқармасы төрағасының орынбасары:

- Биылғы жылы университетте 33 объект ашылған екен. Ол енді лаборатория болсын, басқа да мынау инновациялық орталықтар. Соның біреуі биылғы жылы 2 воркаут зона дейді. Бүгін екіншісі ашылып отыр. Бұл жалпы студенттердің бос уақытын босқа өткізбей, спортпен айналысуына қолайлы жағдай. 

Университет басшылығы мұндай жобалар алдағы уақытта да жалғасын табатынын айтады. Бұл бастама жастардың салауатты өмір салтын қалыптастыруға және спортты насихаттауға бағытталған.

Ғазиза Мұхамеджанова, Нұрғали Мамырбаев