Қызылорданың лифтілері талапқа сай ма

Қызылорда қалалық тұрғын үй инспекциясының мәліметіне сүйенсек, облыс орталығындағы денсаулық сақтау, кәсіпкерлік нысандарында, әлеуметтік және бюджеттік мекемелерде, сондай-ақ көпқабатты тұрғын үйлерде барлығы 171 лифт қондырғысы мен 10 эскалатор орнатылған. 

– Пайдалану мерзімі өткен және тозығы жеткен лифтілер кезең-кезеңімен ауыстыруды қажет етеді. Қазіргі уақытта көпқабатты тұрғын үйлердегі 2 лифт апатты жағдайда деп танылып, оларды жаңарту мәселесі жергілікті атқарушы органдардың бақылауына алынған, - деді инспекция басшысы Абзал Рысбек. 

Біз қаладағы лифт қойылған көпқабатты үйлерді аралап, сондағы тұрғындармен тілдестік. Сондай үйлердің бірінде ұзақ жылдан бері тұратын Айман Қажығалиева лифт қызметінің сапасына көңілі толатынын жеткізді. Ал қаланың басқа бөлігіндегі тұрғындар лифтіге қатысты проблема барын жасырмады. 

– Мұнда 2019 жылдан бері тұрамын. Лифтінің ара-тұра тоқтап қалып, қиындық тудыратыны бар. Кейбір көршілеріміз сондай жағдайға тап болып, құтқарушыларды көмекке шақырған. Лифт істемей қалғанда баспалдақпен көтерілуге тура келеді. Бұл біз сияқты қарттар үшін оңай емес, - дейді Рақымжан Жанасбаев. 

Қызылорда облыстық төтенше жағдайлар департаментінің мамандары лифт ішінде адамдардың қалып қою фактілері негізінен көпқабатты тұрғын үйлерде кездесетінін жеткізді.

– Жыл басынан бері біздің мамандар осындай шақыртуға 8 рет барып, 11 адам құтқарды, оның екеуі – бала. Ал өткен жылы лифтіде қалған адамдардың шақыруымен 1 рет құтқару жұмысына барғанбыз, - деді департаменттің жедел құтқару жасағы басшысының орынбасары Мирамбек Доспенбетов. 

Сала өкілі лифт ішінде қалған жағдайда қандай әрекет жасау керегін де қаперге салды. 

– Ең алдымен сасқалақтамай, қорқынышқа жол бермей, лифт ішіндегі дабыл тетігін басу керек. Лифт ішінде техникалық қызмет көрсететін маманның телефон нөмірі жазылып тұрмаса, ұялы телефон арқылы 112-ге хабарласып, департаменттің жедел кезекшісіне жағдайды нақты хабарлап айту керек, - дейді ол.

Қалалық тұрғын үй инспекциясы қызмет көрсетуші ұйымдардың техникалық қызмет көрсету мерзімін сақтау, лифтілерді жоспарлы тексеру жұмыстарын күшейту, тозығы жеткен лифтілерді кезең-кезеңімен алмастыру бағытында іс-шаралар қабылдағанын мәлімдеді. 

– Лифтілердің күнделікті техникалық күтімімен, ағымдағы жөндеу жұмыстарымен тұрғындардың абоненттік төлеміне сәйкес қызмет көрсетуші компаниялар айналысады. Тұрғындардың қалтасына салмақ түспейді. Ал лифтілерді толық ауыстыру немесе күрделі жөндеу шығындары сметаға сәйкес есептеліп, мемлекеттік бағдарламалар мен жергілікті бюджет есебінен қаржыландырылады, - деді инспекция басшысы.

Бұған дейін біз Қызылорда қаласы, Желтоқсан көшесі бойында орналасқан көпқабатты үйлердің бірінде 2 ересек адамның 3 және 4-қабаттардың арасында лифт ішінде қалып қойғанын жазғанбыз.