Риддерде жылыту маусымы талапқа сай өтіп жатыр

Өскемен, Риддер және Екібастұз қалаларындағы тозығы жеткен 9 жылу энергия орталығы төтенше жағдайдың «қызыл аймағынан» шығарылған болатын.

Қазір Риддер жылу энергия орталығы қосалқы қазандықтармен қамтылса, Кентау қаласындағы жылу станциясындағы алты қазандық күрделі жөндеуден өтті. 

Биылғы қыста Риддер жылу электр орталығы толық қалпына келтірілген төрт қазандықтың барлығын қайта іске қосты. Электр жабдықтары түгел ауыстырылды. Соңғы үш жылда электр стансасын жаңғыртуға 15,5 млрд теңге инвестиция тартылды. Нәтижесінде жабдықтардың тозу деңгейі 75-тен 43 пайызға дейін төмендеді.

Шығыс Қазақстан облысында таяу күндері ауа райы -38 градусқа дейін төмендейді деп күтілуде. Сондықтан Риддерлік энергетиктер жақын арада тағы бір қосымша қазандықты іске қоспақ. Ал келесі жылғы жаңғырту жұмыстарына бюджеттен 2 млрд теңгеге өтінім дайындалып жатыр. 

Кирилл Голота, Риддер қалалық жылу электр орталығы директорының міндетін атқарушы:

- Биылғы жылға орталықтандырылған жылу желілерінің төрт учаскесін жөндеуді жоспарлап отырмыз. Сондай-ақ №1-ші турбогенераторды күрделі жөндеуден өткізу жұмыстары басталады. 

Риддерліктер қысқа сақадай сай. Көпқабатты үй тұрғындары өздері қаржы жинап, үйдің ішкі инженерлік желілерін толық ауыстырған. Жергілікті тұрғын Светлана Байтенева Риддер жылу электр орталығы ұзақ жылдардан кейін биыл алғаш рет үзіліссіз жұмыс істеп тұрғанын айтады.

Светлана Байтенева, Риддер қаласының тұрғыны:

- Көп жылдан бері жылу электр орталығында мәселелер туындап, жылуға жарымай келдік. Жертөледегі желілердің бәрі тозып, қанша жөндегенмен мәселе шешілмейтін. Қыс бойы бүрсеңдеп шығатынбыз. Қазір жылу үздіксіз беріліп, жанның рахатын сезіне бастадық.  

Былтыр күрделі жөндеуден өткен Кентау қаласындағы №5 жылу энергия орталығы қазір 14 мыңнан астам абонентті жылумен қамтамасыз етіп отыр. Екі жылға жоспарланған күрделі жөндеу жұмыстары кезінде 6 қазандық қайта құрылымдаудан, екі қазандық ағымдағы жөндеуден өтті. Қазір төрт қазандық қаладағы 347 көпқабатты тұрғын үй мен 108 бюджеттік мекемені және 440-тан астам коммерциялық нысан мен 2250 жер үйді жылумен және ыстық сумен қамтамасыз етіп отыр. Қалған төрт қазандық резеврте тұр. 

Гүлнар Әлжан, Кентау қаласының тұрғыны:

- Биылғы маусымда үй жылы, батарея ыстық. Бұрын қазандық жаңармай тұрғанда үй салқын болатын. Әсіресе бірінші қабаттар өте салқын болатын. Қазір жақсы, жаурап жатқан жоқпыз, бала-шағамыз желең жүр. 

Соңғы 15 жылдан бері мүлдем жөндеу көрмегендіктен қазандықтардың 95 пайызы әбден тозған болатын. Көптен күткен жөндеу жұмыстарының нәтижесінде жылу орталығы биыл алғаш рет әзірлік құжатын алды. Одан бөлек тағы екі турбоагрегат жаңғыртылды. Мамандар осының нәтижесінде қазандықтар жүз пайыз жаңартылып, автоматтандырылған басқару жүйесі енгізілгенін айтады. Электр қуатын өндіретін қазандықтардың жұмысы жақсарған. 

Мұхтар Мұхиддинов, Жылу энергия орталығының бас инженері:

- Негізі бұл станцияның мақсаты – бірінші электр энергия өндіру. 6 МВт электр энергия өндіріп отыр. Өзімізді жауып отырмыз, сыртқа 4,2 МВт электр энергия шығарып отырмыз. Одан шыққан бумен қалаға кететін суды қыздырамыз. Сыртқы ауаның температурасымен 70 градус, қайтып келіп жатқан судың температурасы 55. Қуат өндірген бумен қайтадан қыздырып, осындай режимде жұмыс істеп жатырмыз. 

Сондай-ақ өткен жылы 7,6 млрд теңге қаралып, оған 14 шақырым магистральды жылу және 66 шақырым ішкі орам жылу жүйелері ауыстырылды. Қалған 14 шақырымы биыл жаңғыртылады деп жоспарлануда. 

Авторлары: Жандос Жұмабек, Ерболат Әбіш, Вячеслав Ветлугин, Дмитрий Пыхтин