RAF: Жарнама және медиа саланың жетекші мамандары Алматыда бас қосты

Жарнама және медиа саласының жетекші сарапшылары мен тәжірибелі мамандары бүгін Алматыда бас қосты.

Дәстүрлі аймақтық жарнама форумы биыл - сала қай бағытта даму керек, қандай құралдар нәтижелі деген келелі мәселелердің алаңына айналды.

Цифрлық бағыт дамып, жасанды интеллект қарқын ала бастаған қазіргі уақытта телевизияның трансформациясы керек. Ғаламтормен тоғыса даму - уақыт талабы, дейді сарапшылар. Телеконтент интернет қолданушыларға өтімді болуы тиіс. Қазір көгілдір экран бұл бағытқа төселіп келеді. Дегенмен, телевизияның өз артықшылығы бар. Телеөнімнің ерекшелігі кәсібилік пен сапада жатыр.     

Кемелбек Ойшыбаев, "Хабар" Агенттігі" АҚ Басқарма төрағасы, Қазақстанның ұлттық медиа қауымдастығының жетекшісі:

- Central Asia Genesis деген компания бар, Ютубтың ресми серіктесі. Солардың жасаған зерттеуі бойынша жалпы интернетті, әсіресе Ютубта  қаралатын контенттің 70-80 пайызы телеарналардың дайындаған контенті. Себебі бір жағынан сапаға бөлек көзқарас, қарауға, көзге тартымды. Екіншіден, профессионалдар жасаған контент профессионал емес адамдар жасаған контенттен әлдеқайда айырмашылығы бар. Сондықтан интернет келіп телевидениені алмастырады деген кейбір ойлар да айтылады. Ол олай емес, телевидение де трансформациядан өтіп, интернетте де жақсы дамуы керек бренд ретінде.

Брендтің беделі басым. Жарнама берушілердің таңдауы да осы. Бұл телевизияның қашанда сұранысқа ие екенін көрсетеді. Ең бастысы интернет аудиторияға бейімделумен қатар,  дәстүрлі телевизияны сақтау да маңызды 

Ильмурат Джумаев, Орталық Азия жарнама қауымдастығының президенті:

- Менің ойымша, қазіргі таңда телевидениені басқа бұқаралық ақпарат құралдарынан ерекшелендіріп тұрған бағытын сақтау өте маңызды. Барлық сауалнамалар мен зерттеулерге қарағанда, адамдар ең көп сенетін ақпарат көзі – телевизия.  Телевидение – бұл фактчек, яғни тексерілген ақпарат көзі екені түсінікті. Телевидение жалған ақпарат таратпайды – міне осыны сақтау қажет. Негізгі мақсат –салмақты да сараптамалық дүние ұсыну.

Форум жарнама саласы мамандарын мазалаған мәселелерді талқылаумен аяқталды. Қатысушылар жасырын сауалнамаға қатысып, осы кәсіптегі тәуекелдерді талдады. Тәжірибелі мамандар брейншторм әдісі арқылы қалай әрекет етуге болатынын айтып, түрлі идеялар ұсынды.

Гүлжан Көленқызы, Мұхит Құдықбаев