Райымбек ауданы ұзақ жасаған қариялардың көптігімен ерекшеленеді

Райымбек ауданы ұзақ өмір сүрген тұрғындарының көптігімен ерекшеленеді.

Ғасыр жасаған қариялардың дені Хан Тәңірінің баурайындағы Қаратоған мен Жамбыл ауылында тұрады. Шалғай елді мекендерде жасы жүзден асқан 4 қария болса, 90-ға келгендердің саны 30-ға жеткен. Ал Райымбек ауданы бойынша тоқсаннан асқан қариялар мен кейуаналар саны 200-ге жуықтайды.

Райымбек ауданы, Қаратоған ауылының тұрғыны Мэлс Әлімбековтың жасы тоқсанға таяп қалды. Қария әлі күнге дейін отын жарып, көмір тасып, қорадағы малды өзі жайғайды. Колхозда ұзақ жылдар бойы механизатор болған ол қол қусырып, үйде отырғанды ұнатпайды. Қарияның пікірінше, адам үнемі қимыл-қозғалыста болуы керек.    

Мэлс Әлімбеков Қаратоған ауылының тұрғыны:

- Ол ауаның тазалығы, одан кейін мына алтын аққан судан ішеміз қысты күні мынау су түспей тұрғанда. Бір жағы сол алтынның несі ғой, дәрілігі. Енді мынау қолымыздан тачкамыз түсті былтырдан бері. Су түсті, су үйге кірді. Енді газ келсе сондай жақсы ғой. 

Жамбыл ауылының тұрғыны Нұрғали Көпесбаев та жастайынан трактор айдап, 1987 жылы зейнетке шыққан. Қария екі айдан соң 90 жылдық мерейтойын атап өтеді. 

Нұрғали Көпесбаев, Жамбыл ауылының тұрғыны:

- Ұзақ өмір сүрудің сыры, біріншіден, Алланың берген жасы. Екінші, судың тұнықтығы, ауа райының жақсылығынан ұзақ өмір сүреді. Адамның, жан-жануардың барлығы сол. Ал мынау күн ыстық, суық жерлерді есептеп көрсең, онша ұзаққа бармайды. Алды 70, 60 жаста қайтыс болып жатқанын естиміз.

Шолпан Нүсіпәлиева, Жамбыл ауылының тұрғыны:

- Ауа райы жақсы, суы тұнық, суы таза, бұл жерден алтын руда да шығып жатыр, көмір де шығып жатыр, жаман жер емес. Осы ауа райының жақсылығанан осы халге келіп жатырмыз, әке.

Райымбек ауданының орталығы Нарынқол мен Жамбыл, Қаратоған ауылдары бастауын Хан Тәңірінен алатын Байынқол өзенінің жағасында орналасқан. Аталған ауылдарға екі-үш жыл бұрын орталықтандырылған ауызсу құбыры тартылғанымен, көпті көрген көнекөз қариялар әлі күнге дейін басынан алтын шайған Байынқолдың суын тұнғанды жөн көреді. Өйткені туған жердің жұпар аңқыған ауасы мен тау өзенінің суын қасиетті деп біледі және ұзақ өмір сүрудің бар сыры осында деп есептейді.

Ардақ Айбарұлы, Аманжол Жөңкешов