Панфилов ауданы қарқынды дамып жатыр

Жетісу облысының шекаралық Панфилов ауданында әлеуметтік сала нысандарын нығайту жұмыстары белсенді жүріп жатыр. Соңғы екі жылда денсаулық сақтау саласында 18 жаңа нысан салынып, 3 объекті жөнделді. Ауылдық жерге барған 17 дәрігерге жалпы 135 млн теңге көлемінде көтерме жәрдемақы төленіп, бұл медициналық кадр тапшылығын азайтуға мүмкіндік берді, деп жазады Egemen.kz.

Шежін, Надек, Қырыққұдық, Алтыүй, Алмалы, Тұрпан, Ақжазық сияқты ауылдарда дәрігерлік амбулаториялар, ал Аққұдық, Диханқайрат, Сарытөбе, Садыр, Сұптай, Қорғас елді мекендерінде фельдшерлік пункттер салынды. Бірқатар ауылдарда медициналық пункттер пайдалануға беріліп, аудандық аурухананың жаңа блогын салу жұмыстары басталды. Сонымен қатар 2024–2025 жылдары ауданға 6 санитарлық автокөлік әкелініп, жыл соңына дейін аурухана 13 жаңа құрал-жабдықпен қамтамасыз етіледі.

Білім саласында да оң өзгерістер бар: Жаркентте 1200 орындық, Талдыда 300 орындық жаңа мектептер ашылды. Сұптай ауылында 120 орындық мектептің құрылысы жүріп жатыр, Әулиеағаш мектебі толық жөндеуден өтті. Мәдениет және спорт нысандары да жаңартылып, Тұрпанда мәдениет үйі жөнделіп, Үшарал мен Көкталда спорт кешендері қолданысқа берілді.

Әлеуметтік инфрақұрылымның жаңаруы аудан тұрғындарының сапалы медициналық көмек алуына, жайлы білім алуына және бос уақытын тиімді өткізуіне жағдай жасап, өмір сүру сапасын айтарлықтай жақсартуда.