Ректор ҚазҰУ базасында қолөнер орталығының ашылатынын мәлімдеді

Әл-Фараби атындағы Қазақ ұлттық университетінде «AI-Art: Бояудағы болашақ» атты шығармашылық пленэр ұйымдастырылды, деп хабарлайды Egemen.kz.

Өнер сүйер қауымның назарына кәсіби қылқалам шеберлері Мәлік Қайдаров, Құрманғазы Ақашев, Ернат Иманбакиев, Нұрболат Талғатұлы, Айдос Сейдақұл, Мәлік Жұмағұлов, Бақтияр Бүркітбаев, Төлеген Сүлейменов, Серік Тайнов, Нұрлан Сатаев, Серік Ағатаев, Ақмарал Қажыбек, Перизат Тайнова, Тұрғын Абдурахман және басқа да суретшілердің 30-ға жуық жұмысы ұсынылды.

Майлы бояумен салынған туындыларда Әл-Фараби атындағы ҚазҰУ-дың жылдың төрт мезгіліндегі көрінісі бейнеленген. Университеттің сәулеттік келбетімен қатар, оның рухани орталықтары мен оқу ғимараттары қамтылған.

Көрме жұмысымен танысқан ҚазҰУ ректоры Жансейіт Түймебаев суретшілердің туындыларын жоғары бағалап, мұндай мәдени жобалардың жастар арасында ұлттық құндылықтар мен бейнелеу өнерін дәріптеуге жол ашатынын атап өтті. Сонымен қатар университет қалашығында қыс-көктем айларында да пленэр ұйымдастыру қажеттігін айтты.

«Пленэрге қатысушы суретшілер ҚазҰУ-дың көрінісін жоғары деңгейде бейнелеген. Бұл туындылар оқу ордасындағы 16 факультетке және кітапханаға қойылып, көшпелі көрме жұмысы ұйымдастырылады. Сондай-ақ алдағы уақытта ҚазҰУ базасында қолөнер, сурет орталығын ашу маңызды», деді ректор.

Жасанды интеллект технологияларын шығармашылық салада қолдануды насихаттау, студенттердің цифрлық ойлау, визуалды экспрессия қабілеттерін дамыту, сондай-ақ жастардың инновациялық әлеуетін арттыруды мақсат еткен көрмеде заманауи технология мен дәстүрлі өнер үйлесім тапқандай.

Жасанды интеллект дәуіріндегі ҚазҰУ-дың дамуы мен болашақтағы келбетін қылқалам арқылы бейнелеу, сондай-ақ жасанды интеллект көмегімен сурет салу конкурсын ұйымдастыру студенттердің қызығушылығын арттыра түсті.

АЛМАТЫ