Ресейге кіруге тыйым салды : әзілкеш Нұрлан Сабуров Алматыға ұшып келмек

Ресейлік БАҚ-тың мәліметінше, бұған дейін Ресейге кіруге тыйым салынған комик Нұрлан Сабуров Алматыға ұшуға ниеттеніп отыр, – деп хабарлайды Aikyn.kz сайты. 

Бұл туралы Mash Telegram арнасы өз дереккөздеріне сілтеме жасап хабарлады. Басылымның ақпаратынша, Мәскеудегі Внуково әуежайында паспорттық бақылау кезінде болған оқиғадан кейін Н.Сабуров Дубайға тегін депортациядан бас тартқан. Себебі дереккөздердің айтуынша, ұшудың міндетті шарты ретінде оған кісен тағу талап етілген.

Нәтижесінде, комик Қазақстанға өз қаражатына билет сатып алған көрінеді.

Mash мәліметінше, Н.Сабуров Мәскеуге БАӘ-ден бизнес-класс арқылы ұшып келген. Кіруге тыйым салынғаны туралы хабар алғаннан кейін ол бірнеше рет депортацияланатынын нақтылаған.

Кейін Дубайға қайтуға ақшасы жоқ екенін айтқан. Ал депортация шарттары түсіндірілген соң, ол ақша тауып, Алматыға билет сатып алған. Дереккөздерге сәйкес, ең жақын рейс түстен кейінгі уақытқа жоспарланған.

Ресейлік БАҚ-тың жазуынша, комик Ресейде тапқан табысын делдалдар арқылы заңдастыруға тырысқан. Ал Н.Сабуровтың Ресейде жалпы құны 60 миллион рубльден асатын мүлкі бар.