Республика күні мемлекетшілдік пен бірліктің нышаны

Осыдан 35 жыл бұрын Егемендік декларациясы қабылданып, еліміз тәуелсіздікке алғашқы қадамын жасады. 1990 жылы 25 қазанда азаттық идеясы шынайы құқықтық және саяси мәнге ие болды.

Сондықтан Республика күні – мемлекеттіліктің, заң үстемдігінің және демократиялық құндылықтардың салтанат құрған күні. Маңызды дата әр азаматқа өзінің ел алдындағы жауапкершілігін, Отан тағдырына деген үлесін терең сезінуге шақырады. Бұл – тарихымызды жаңаша пайымдап, елдіктің негізін қалаған тұлғаларға тағзым ететін, ұлттың рухын асқақтататын ұлттық мереке.

Ел Президенті Қасым-Жомарт Тоқаев атап өткендей, «Республика – біздің тәуелсіздігіміздің бастауы, елдік пен егемендіктің белгісі». Демек бұл мереке ұлттың санасында мемлекетшіл рухты күшейтіп, болашаққа нық сеніммен қадам басуға жігер береді.

Осы құндылықтарды жүзеге асыруда Қазақстан халқы Ассамблеясы маңызды миссия атқарады. Ассамблея – қоғамдық келісім мен жалпыұлттық бірліктің іргелі институты ретінде елдегі тұрақтылық пен өзара сыйластық мәдениетін нығайтып келеді.

Бүгінде ҚХА бастамалары қоғамның барлық саласында – білімде, мәдениетте, азаматтық қоғам мен жастар саясаты бағытында татулық пен бейбітшілік қағидатын орнықтырып отыр.

Ассамблея қызметінің өзегі – әр этнос өкілін ортақ Отанына деген сүйіспеншілік пен жауапкершілік құндылығы аясында біріктіру. Бұл – Президент айқындаған «Әділетті Қазақстан» тұжырымдамасымен үндес мақсат. Яғни Республика күнінің ел бірлігін, бейбітшілік идеясын жаңғыртатын рухани мәні бар.

Шерзод ПУЛАТОВ,

ҚХА-ның республикалық этомедиация кеңесінің төрағасы,

Президент жанындағы Ұлттық құрылтай мүшесі