Жауапкершілік пен мемлекетшілдік

Ал мазмұны жағынан мемлекеттік биліктің алдағы бірнеше жылға арналған саяси-экономикалық бағытын түсіндіруге арналғанын аңғаруға болады. Президент экономикалық өсім мен реформалар туралы айтқанда, қол жеткен жетістіктерді айтады. Сонымен қатар қоғамдағы түйткілді мәселелерді назардан қағыс қалдырмайды.

Мәселен, Қазақстан экономикасы 6 пайыздан астам өсіп, ішкі жалпы өнім 300 миллиард долларға жеткен екен. Бұл көрсеткіш көңіл көншітсе керек. Алайда  Мемлекет басшысы осы өсімнің аза­маттардың күнделікті тұрмысына тікелей әсер етпей отырғанын да жасырмайды.

«Инфляция деңгейінің жоғары болуы азаматтарымыздың әл-ауқатын арттыруға арналған еңбектің бәрін текке кетіріп жатыр», – деді Қасым-Жомарт Тоқаев.

Расында, халықтың тапқан табысын инфляция «жеп» қойып жатыр. Елдің әлеуметтік, тұрмыстық жағдайына байланысты әңгіме болғанда Мемлекет басшысы осындай түйткілдерді ашық айтып отыр. Сұхбаттың өне бойында барды бар, жоқты жоқ деп айтып отырғаны мемлекеттің бүгіні мен ертеңіне деген жауапкершіліктің жоғары екенін көрсетсе керек.

Уақыт талабына сай нақты әрекет ету арқылы жағдайды жақсартуға болатынын үнемі қаперге салып келеді. Мемлекет басшысы тығырықтан тез шығудың бір амалы ретінде жасанды интеллектіні дұрыс пайдалануға баса маңыз береді.

Жасанды интеллект пен цифрландыру саласын дамытуда мамандандырылған ғылыми-зерттеу университеті ашылатынын айтты. «Жоғары деңгейде жасанды интеллект туралы заң қабылданды, жаңа заң жақында күшіне енеді. Жасанды интеллект және цифрлық даму министрлігі құрылды. Alem.Cloud және Al-Farabium деп аталатын екі суперкомпьютер іске қосылды. Көп ұзамай Жасанды интеллект мамандандырылған зерттеу университеті ашылады». Бұл мемлекеттік бастама ретінде жарияланды және салалық реформалар шеңберінде қарастырылып отыр. Бұл бағытта: білім саласында AI-Sana бағдарламасы іске қосылған; оның бірінші кезеңінде 650 мыңға жуық адам жасанды интеллект негіздерін оқып, сертификат алған. Жасанды интеллект пәндері 90-нан астам уни­верситеттің оқу жоспарларына енгізілді, 20 жоғары оқу орны 25 жаңа бағыт ашыпты. Сондай-ақ профессор-оқытушылар мен студенттерді тереңдетіп оқытатын курстар мен акселерация бағдарламалары да  әзірленіп жатыр.

Ғылыми-зерттеу университетінің ашылуы – жалпымемлекеттік стратегия­ның бір бөлігі, білім беру мен технология­лық зерттеулерді жүйелі түрде дамытуға ба­ғытталған қадам. Осы арқылы біз жоғары деңгейдегі кадрлар даярлау, инновация­лық зерттеу, сондай-ақ жасанды интеллект саласындағы ғылыми жұмыстарды бір орталыққа тоғыстыру сияқты міндеттерді жедел шешетін боламыз.

Сұхбаттың соңғы жағында  Қасым-Жомарт Тоқаев жеке болмысы мен мінез-құлқы туралы сұрақтарға да ашық жауап берген екен. Мемлекет басшысы жеке өмірін жария етуден гөрі, өзінің кәсіби ұстанымы мен өмірлік қағидаттарына ай­рықша  мән беретінін аңғартады. Тоқаевтың алғашқы мамандығы – қытайтанушы. Президент осы саланың өзі табандылық пен ұқыптылықты талап ететінін атап өтеді.

«Мәтінмен жұмыс істеуге әбден дағ­дыланғанмын, нашар стильді, әсіресе, әріп қатесін суқаным сүймейді. Жолдауларымды, сөйлейтін сөздерімді, мақалаларымды, тіпті әріптестеріме жолданатын хаттардың бәрін тікелей өзім қарайтынымды аппа­раттағылардың барлығы біледі», – деді.

Президенттің  саналы ғұмыры негізінен тәртіп пен жауапкершілікке толы екенін білеміз.  Мемлекеттік қызметтің барлық сатысынан өткен. Бұл оның дүниетанымы мен мінезіне де әсер еткендігі анық. Осы тұста ол өзі туралы қысқаша ғана сипаттайды: «Сіз кімсіз?» деген сұрағыңызға қысқаша ғана «мен – мемлекетшіл адаммын» деп жауап берейін», – деді Тоқаев.

Мемлекет басшысының ұстанымы – жауапкершілік. Өмірлік қағидаты – мем­лекетшілдік. Біздің көптеген шенеунік­терімізге осы екі нәрсе жетісе бермейтінін де көріп жүрміз.

Бір сөзбен айтқанда, бұл сұқбат жылдағы дәстүр негізінде, дәл Жаңа жылдың беташар тұсында беріліп отыр. Мұның өзі тектен-тек емес. Ескі жылға есеп, жаңа жылға жоспар деп қабылдасақ та болады.

Нұртөре ЖҮСІП,

Сенаттың Әлеуметтік-мәдени даму және

ғылым комитетінің төрағасы