Сарапшылар цифрлық технологиялардың саяси коммуникацияға ықпалын талқылады

Фото: ҚСЗИ

Іс-шара барысында сарапшылар цифрлық дәуірдегі саяси коммуникацияның трансформациясын, сайлауалды үгіт-насихатта жасанды интеллектіні қолдану мәселелерін, жалған ақпаратқа қарсы іс-қимылды, сондай-ақ электоралдық мінез-құлықтың заманауи үрдістері мен саяси партияларға қатысты қоғамдық сұранысты талқылады.

Алғашқы сессияны ҚСЗИ директоры Жандос Шаймарданов жүргізді. Ол жасанды интеллект пен жаңа цифрлық құралдар сайлау науқандарының ажырамас бөлігіне айналып келе жатқанын, алайда басты фактор азаматтардың ақпаратқа деген сенімі болып қала беретінін айтты.

«Жасанды интеллектіні жауапкершілікпен пайдалану және сайлаушыларды қорғау тетіктерін дамыту алдағы электоралдық циклдерде маңызды рөл атқаратын болады», деді Жандос Шаймарданов.

Жиында Жасанды интеллект және цифрлық даму вице-министрі Бақтияр Мұхаметқалиев жасанды интеллект көмегімен жасалған контентті заңнамалық тұрғыдан реттеу және міндетті түрде таңбалау қажет екенін атап өтті. Оның айтуынша, азаматтардың цифрлық сауаттылығын арттырумен қатар, жеке деректерді қорғауға ерекше мән беру қажет. Сондай-ақ мемлекет халықаралық цифрлық платформалармен және технологиялық компаниялармен өзара іс-қимылды күшейтіп жатқанын жеткізді.

Абзал Құспан: Сайлаудың сапасы партиялардың кадрлық әлеуетіне байланысты болады

Ал Президент жанындағы ОКҚ Дезинформацияға қарсы күрес орталығының басшысы Руслан Бекарсланов жалған ақпаратпен тиімді күресу үшін ресми ақпарат көздерінің жедел жұмысы, фактчекинг мәдениетін дамыту және қоғамның цифрлық сауаттылығын арттыру маңызды екенін айтты.

Саясаттанушы Талғат Қалиев қазіргі сайлау науқаны барысында партиялар дәстүрлі үгіттен ашық саяси пікірталасқа көбірек ден қоя бастағанын атап өтті. Оның пікірінше, партиялар құрамының жаңаруы қоғамның жаңа тұлғалар мен жаңа идеяларға деген сұранысын көрсетеді.

«Бүгінде қоғам саяси кемелденудің табиғи кезеңінен өтіп жатыр. Осы үдерісте сайлаушылар бағдарламаларды өз бетінше бағалауды, популистік мәлімдемелерге сыни көзқараспен қарауды және қоғамдық пікір көшбасшыларының ықпалы артып отырған ақпараттық кеңістікте дұрыс бағдар табуды үйреніп жатыр», деді ол.

Екінші сессияны Қазақстандық қоғамдық даму институты басқармасының төрағасы Жұлдызай Ысқақова жүргізді. Онда электоралдық мінез-құлықтың өзгеруі, қоғамдық сұраныстың трансформациясы және азаматтардың саяси таңдауына әсер ететін факторлар талқыланды.

Сарапшы болжамы: Құрылтай құрамы қаншалықты жаңаруы мүмкін?

Президенттік орталық директорының орынбасары Мариан Әбішева сайлаушылар үшін партиялардың бағдарламалары, кандидаттардың кәсіби деңгейі мен әлеуметтік-экономикалық мәселелерді шешу қабілеті барған сайын маңызды факторға айналып келе жатқанын айтты.

«Әлеуметтанулық зерттеулердің нәтижесіне сәйкес, азаматтардың 84 пайыздан астамы еліміздегі қоғамдық-саяси ахуалды тұрақты деп бағалайды. Сенім мен қоғамдық оптимизм конституциялық реформаларды жүзеге асырудың маңызды ресурстары болып саналады», деді сарапшы.

Сарапшылар алаңында өзге де қатысушылар пікір білдіріп, қазіргі электоралдық жүйенің тиімді дамуы ақпаратқа деген сенімді нығайтуға, цифрлық технологияларды жауапкершілікпен пайдалануға, мемлекет, саяси партиялар мен қоғам арасындағы сындарлы өзара іс-қимылды күшейтуге, сондай-ақ электоралдық мәдениет пен азаматтық белсенділікті арттыруға тікелей байланысты екенін атап өтті.

Еске сала кетейік, елімізде Құрылтай сайлауы 23 тамызға белгіленді.