Сенат халықаралық келісімді ратификациялайды

Бюро отырысын ашқан Мәулен Әшімбаев елдің әлеуметтік-экономикалық даму жолындағы маңызды міндеттерге назар аударды. Ол Мемлекет басшысының бастамаларын іске асыру үшін тиісті заңнамалық база құру қажет екенін атап өтті. Бұл ретте Құрылыс және Цифрлық кодекстерді, Банктер мен банк қызметі туралы және Құқық бұзушылық профилактикасы туралы заңдарды сапалы қарап, уақытылы қабылдау айрықша маңызға ие.

Белгіленген күн тәртібіне сәйкес, сенаторлар алдағы бейсенбіде «Тәуелсіз Мемлекеттер Достастығына қатысушы мемлекеттерде радиоактивті материалдарды трансшекаралық тасымалдау туралы келісімді ратификациялау туралы» заңды қарайды. Келісімнің мақсаты – радиоактивті материалдарды трансшекаралық тасымалдаудың қауіпсіздігін қамтамасыз етуге, ядролық және радиациялық қауіпсіздікті арттыруға және физикалық қорғауды қамтамасыз ету қағидаттарын ескере отырып, радиоактивті материалдарды тасымалдауға қойылатын ұлттық талаптарды оңтайландыруға жәрдемдесу.

Сонымен қатар «Қазақстан Республикасының Үкіметі мен Түрікменстан Үкіметі арасындағы қылмыскерлікке қарсы күрестегі ынтымақтастық туралы келісімді ратификациялау туралы» заң да Сенаттың алдағы отырысының күн тәртібіне шығарылды. Келісімді ратификациялау екі елдің құқық қорғау органдары арасындағы өзара іс-қимылдың тиімділігін арттыруға, өңірлік қауіп­сіздікті және тұтастай алғанда екіжақты қатынастарды нығайтуға ықпал етеді деп күтілуде.

Бюро отырысында депутаттар Сенаттың іс-шаралар жоспарын орындау мәселелерін де талқылады. Соның аясында осы аптада Қазақстанда көміртекті реттеу жүйесін дамыту перспективалары, оның ішінде шығарындыларды азайту жөніндегі мақсаттарға қол жеткізу үшін көміртекті офсеттерді пайдалану тақырыбына арналған дөңгелек үстел және бірқатар көшпелі отырыс өтеді. Іс-шарада сенаторлар Мәжіліс қабылдаған заңдарды жұмыс үшін тұрақты комитеттерге бөліп берді.

М. ТӨЛЕУ