Шакқалиев Wildberries қоймаларындағы өрттер аясында қазақстандықтарға кеңес берді

Сауда және интеграция министрі Арман Шаққалиев қазақстандықтарға тауардың уақтылы жеткізілуіне кепілдік беретін маркетплейстерді таңдауға кеңес берді. "Wildberries қоймаларындағы өрттерден кейін сатып алушыларға тапсырыс беруге бола ма?" деген сұраққа ол осылай жауап берді, деп хабарлайды Tengrinews.kz тілшісі.

Үкіметте өткен брифингте журналистер министрден қоймалардағы бірқатар өрттен кейін маркетплейс арқылы тауарға тапсырыс беруден сескеніп қалған қазақстандықтарға қандай ұсыныс айтатынын сұрады.

Шаққалиевтің айтуынша, сатып алушылар тәуекелдерді мұқият бағалап, өздері сенетін алаңдарға басымдық беруі керек.

"Менің кеңесім қарапайым: өздеріңіз сенетін маркетплейстерді таңдаңыздар. Жағдайды саралаңыздар. Тауардың кепілді жеткізілуін қамтамасыз ететін алаңды таңдау қажет. Сонда сіз тұтынушы ретінде тұтынушылардың құқықтарын қорғау туралы заңнамаға сәйкес көбірек қорғаласыз", - деді министр.

Ол алаңды таңдау кезінде тек тауардың құнына ғана емес, жеткізудің сенімділігіне де назар аудару маңызды екенін атап өтті.

"Кейде нарықтағыдан айтарлықтай төмен баға әрқашан күмән тудырады. Бұның немен байланысты екенін және қандай салдары болуы мүмкін екенін түсіну керек", - деп толықтырды Шаққалиев.

Министр қазақстандықтарға отандық маркетплейстерді жиірек пайдалануды ұсынды. Оның айтуынша, қазіргі жағдай тұрақты логистика мен тауардың кепілді жеткізілуі қаншалықты маңызды екенін көрсетті.

"Әрине, өзімізден тапсырыс беруге, сізге кепілді түрде жеткізілетін өнімді сатып алуға тырысу керек. Бұл ең негізгі түйткіл", - деп түйіндеді ол.

Айта кетейік, Wildberries логистикалық нысандарындағы өрт сериясы бірнеше аптадан бері жалғасып келеді.

Бұған дейін компанияның Мәскеу облысының Электросталь қаласындағы және Тамбов облысының Котовск қаласындағы қоймаларында өрт болған. Ресми мәліметтер бойынша, сол кезде сегіз адам қаза тауып, 50-ге жуығы жараланған.

Кейін Краснодар мен Ставрополь өлкесіндегі Невинномысск қалаларындағы логистикалық нысандарда, содан кейін Ленинград облысында, Тверьде, Симферопольде, Рязань, Пенза, Волгоград, Владимир облыстарында, сондай-ақ БАҚ мәліметтері бойынша, Зеленодольск (Татарстан), Пермь өлкесі мен Удмуртияда өрт тіркелді.

Оқиғалардан кейін Wildberries логистикалық тізбектерді өзгерткенін, тауарларды қоймалар арасында қайта бөлгенін және тапсырыстарды штаттық режимде орындауды жалғастырып жатқанын хабарлады. Сондай-ақ компания бұған дейін Қазақстанда жаңа логистикалық нысандар салу туралы жоспарын айтқан болатын, алайда Қазақстанның Сауда және интеграция министрлігі ел аумағында қосымша қоймаларды орналастыру бойынша ресми өтініш әзірге түспегенін хабарлады.

Тағы оқыңыз: Wildberries бірнеше өрттен кейін Қазақстаннан бос қоймалар іздестіріп жатыр

Google News арқылы жаңалықтарымызды қадағалаңыз