Шетелдегі қазақ студенттері ұлттық құндылықты ұлықтайды

Шетелдегі қазақ студенттері ұлтымыздың ұлы мерекесі – Тәуелсіздік күнін тойлады. Туған топырақтан жырақта жүрген жастар ән мен күйден шашу шашып, халқымыздың мәдени мұрасы мен бай тарихы туралы шетелдік достарына баяндап берді.

Бұл Германияның Бремен қаласында оқитын қазақстандық студенттер. Олар бір үйдің баласындай дастархан басына жиналды. Басты себеп – еліміздің ең қасиетті мерекесі –Тәуелсіздік күнін атап өту. Отырыста ән шырқалып, күй де төгілді.

Әсел Бекмолдаева, Constructor университетінде тағылымдамадан өтуші:

- Жастар әлемге біздің мемлекетіміздің қандай бауырмал екенін, қандай тарихымыз бар екенін, қандай үлкен мемлекет екенімізді көрсетіп, отанымызды таныстыру болатын. Сондай-ақ біз мұнда жырақта жүргенімізбен өз отанымызды өте сағынамыз. Бір-бірімізбен қауышқымыз келеді. Бір-бірімізбен дәм бөліскіміз келеді. Осы мереке соған кәдімгідей бір үлес қосты.

Әсел биыл Халықаралық бағдарламалар орталығы қолға алған «Болашақ» бағдарламасының Амбассадоры» жобасының қатысушысы. Басты мақсаты – шетелде білім алып жүрген қазақстандық студенттерді қолдау. Амбассадор болуға 100-ге жуық өтінім келіп түсіп, ішінен 36 үміткер іріктелген. Қазір олар АҚШ, Ұлыбритания, Австралия, Ресей, Германия, Франция, Мажарстан, Польша және Сингапур сынды тоғыз елде жұмыс істеп жатыр.

Қайсар Еркінбаев, «Халықаралық бағдарламалар орталығы» АҚ басқарма төрағасының орынбасары:

- Қазіргі таңда АҚШ-тың, Ұлыбританияның және Еуропаның беделді университеттерінде оқып жатқан студенттеріміз әртүрлі бағытта іс-шаралар өткізіп жатыр. Ол – бірінші кезекте біздің елшілікпен байланыс. Екіншіден, мәдени, спорттық және де осы Қазақстан Республикасында іске асып жатқан маңызды жобаларды шетелдегі өзіміздің қазақстандық коммьюнитиге түсіндіру. Бұл өте маңызды. Себебі олар шетелде оқып жатқан кезде бізбен кері байланыста әрқашан болуы қажет.

Бүгінде амбассадорлар шетелдегі қазақ жастарының белсенділігін арттырып, ұлттық мәдениетті насихаттайтын көрмелер, кездесулер, шағын фестивальдер өткізіп келеді. Сонымен қатар елшіліктер мен консулдықтармен тығыз байланыс орнатып, студенттердің құқықтық, мәдени және ақпараттық қолжетімділігін жақсартуға бағытталған бастамалар көтереді.

Авторы: Серік Селеубайұлы