Шөлдегі Давос : Эр Рияд жасанды интеллектіге инвестиция тартып жатыр

«Өркендеудің кілті» ұранымен өткен форумның 9-сессиясы жаһандық көшбасшыларды, инвесторларды және ірі бизнес өкілдерін біріктіріп отыр. Негізгі назар жаңа экономикалық ынтымақтастық модельдеріне, технологиялардың даму ықпалына және мемлекеттік-жекеменшік серіктестікті нығайтуға аударылған.

Форум Эр-Риядтағы король Абдулазиз атындағы конференц-орталығында өтуде. Оған мемлекет басшылары, министрлер, тәуелсіз қорлар мен жетекші компаниялардың басшылары және сарапшылар қатысуда. Сонымен қатар АҚШ-тың ірі инвестициялық корпорациялары Goldman Sachs, JP Morgan, BlackRock жетекшілері, сондай-ақ Дональд Трамптың ұлы және Қытай вице-президенті Хань Чжэн бар.

Сауд Арабиясының Мемлекеттік инвестициялық қорының басқарушысы және Saudi Aramco директорлар кеңесінің төрағасы Ясир ар-Румайян форумды ашу барысында соңғы он жыл ішінде FII алаңы арқылы 250 миллиард доллардан астам келісім жасалғанын атап өтті.

Оның айтуынша, әлемдік экономика қарқынды технологиялық өзгерістер дәуірін бастан өткеріп отыр және бұл кезеңде үкіметтер мен бизнес құрылымдарының ортақ әрекеті аса маңызды.

«Бізге халықаралық ынтымақтастықтың жаңа моделін қалыптастыру қажет. Тек біріккен күш-жігер ғана „ортақ өркендеу дәуірін“ қамтамасыз ете алады», — деді ар-Румайян.

Ол қазіргі әлемдік экономиканың көлемі 111 триллион доллардан асқанын, бірақ адамдардың жеке күтулері мен болашаққа деген сенімі арасында алшақтық бар екенін атап өтті.

«Бүгінде адамдардың 66 пайызы өз өміріне риза, алайда тек үштен бірі ғана әлемнің болашағына сеніммен қарайды», - деді ол.

Ясир ар-Румайянның айтуынша, технологиялық прогресс теңсіздікті азайтудың құралына айналуы тиіс, бірақ жасанды интеллектінің өсуі білім беру мен мүмкіндіктерге қолжетімділік арасындағы айырмашылықты тереңдетіп отыр.

Сауд Арабиясы Vision 2030 стратегиясын іске асыру аясында жаңа қалалар, инновациялық өндірістер мен жеткізу тізбектерін дамытып, шетелдік инвестициялар көлемін 24 пайызға арттырып, 31,7 миллиард долларға жеткізген.

Future Investment Initiative Institute атқарушы директоры Ричард Аттиас форумның ашылуында FII алаңының тек пікір алмасу емес, болашақты қалыптастыру орнына айналғанын айтып, денсаулық сақтау, жасанды интеллект және адами капиталды дамыту салаларындағы серіктестік пен инновацияның маңызын атап өтті.

Бұған дейін хабарланғандай, Сауд Арабиясы Vision 2030 бағдарламасы аясында Меккеде жаңа мегажоба іске қосуды жоспарлап отыр.