ШҚО да пиротехника саудаланатын жерлер тексерілді

Шығыс қазақстандық құтқарушылар мен полицейлер пиротехникалық бұйымдар сатылатын сауда орындарына тексеріс жүргізуді бастады.

Рейдтік шаралар өңірдің үш қаласында өтеді. Былтыр заңсыз сауда жасағандардан 200-ден астам қорап контрафакті өнім тәркіленген. Мамандардың мәліметінше, кейбір жағдайларда пиротехника арнайы жабдықталмаған, талапқа сай келмейтін орындарда сақталған. Әрбір анықталған құқық бұзушылық бойынша сатушыларға 70 мың теңгеден асатын әкімшілік айыппұл салынған. Құтқарушылар қолдан жасалған фейерверктер мен петардалардың қауіпті екенін көрнекі түрде де көрсетті. Өңірде пиротехниканы сатуға қауіпсіздік сертификаты бар небәрі төрт ұйым жұмыс істейді.

Тілек Манарұлы, ТЖД басқармасының аға инженері:

- Қауіптілікті анық көрсету үшін біз аққаланың қолына петарда салдық. Эксперимент нәтижелері бойынша тіпті ең кішкентай петарданың өзі аққаланың бір бөлігін толығымен қиратып, үлкен зиян келтіруі мүмкін екені анықталды. Бұл пиротехника адамға қандай жарақаттар әкелуі мүмкін екенінің айқын мысалы. Пиротехникалық бұйымдарды тек арнайы дүкендерден сатып алуға қатаң кеңес береміз.