Шымкентте пиротехника саудасына бақылау күшейтілді

Шымкентте құтқарушылар мен полиция сауда орындарын тексеріп жүр.

Өйткені пиротехникалық заттардың сапа сертификаты болуға тиіс.

Одан бөлек жарылғыш заттарды сақтау, сату ережесінің орындалуы міндетті. Арнаулы рұқсаты жоқ кәсіпкерлер жауапкершілікке тартылады.

Жылда жаңа жыл қарсаңында сауда орындарына бақылау күшейтілді. Сапасы күмән келтіретін пиротехникалардың заңсыз айналымын жою мақсатында тексеріс жүргізіліп, тиісті құжаты жоқ өнімдер тәркіленді. Құтқарушылар мен полицейлер «Заң мен тәртіптің» сақталуын қадағалайды.

Бибіайым Мұсаева, қалалық ПД Әл-Фараби аудандық ПБ аға инспекторы:

- Рейдтік іс-шара барысында күнде 4-5 протокол толтырамыз. Осы шырша бойынша және салют, пиротехника бойынша. Бірінші ауызша ескертіліп айтылды. Заң мен тәртіп бойынша сатуға болмайды.

Тексеріс кезінде кейбір сатушының сауда жасауға рұқсат қағазы, өнімнің сапа сертификаты немесе сақтау талабын растайтын құжаты болмай шықты. Сала мамандарының айтуынша, мұндай жағдайда пиротехникалық заттар адам өміріне   қауіп тудыруы мүмкін.

Жолдас Ахметов, қалалық ТЖД мемлекеттік өрт бақылау басқармасының бас маманы:

- Пиротехникалық бұйымның өзі қауіп. Жану, жарылу қаупі жоғары болғаннан кейін біз барлық тұрғындарға, кәсіпкерлерге түсіндіріп айтамыз. Ол заттың жалпы сертификаты болуы керек зауыттан арнайы шығарылған деп.

Медицина қызметкерлері де пиротехникадан келетін зардап туралы қанық.  Кейде  уақытынан бұрын адамның қолында жарылып, ауыр жарақат алуы мүмкін. Ондай оқиғалар да болған.

Мадина Ермаханбетова, қалалық гипербариялық оксигенация орталығының бас дәрігері:

- Одан адам күйік алуы мүмкін. Бет күйіп қалуы мүмкін. Көз күюі мүмкін. Үлкен пиротехника болса қолда ұстап тұрғанда қолы жұлынып кетіп, тіпті ампутацияға алып келуі мүмкін. 

Мереке қарсаңында гипербарикалық оксигенация орталығының жұмысы күшейтіліп, қосымша дәрігерлік кезекшілік ұйымдастырылды. Алайда сала мамандары соңғы жылдары қайғылы жағдай мен өрт оқиғасы азайғанын айтады. Бұл рейдтік іс-шаралардың нәтижелі екенін көрсетеді, дейді олар.

Нұрсұлтан Мұхамеджан, Нұрмахан Бекмұратов, Нұрмахан Мұсатов