Щучьедегі Палау орталығында өрттен қаза тапқандар саны 12 адамға жетті

Денсаулық сақтау министрлігінің баспасөз қызметінің мәліметінше, Щучье қаласындағы «Палау орталығы» кафесіндегі өрт кезінде зардап шеккен тағы бір адам есін жимастан жансақтау бөлімінде қайтыс болған.

Ер адам Астанадағы Ұлттық шұғыл медицинаны үйлестіру орталығында ем қабылдаған және оның жағдайы аса ауыр болған: өрт кезінде жоғарғы тыныс жолдары қатты зақымданған.

Ақмола облысы Бурабай ауданы әкімдігінің баспасөз қызметі пациенттердің жағдайы бақылауда екенін мәлімдеді.

— Қайтыс болған адамның туған-туыстарына жан-жақты көмек көрсетіледі, оның ішінде жерлеу рәсімін ұйымдастыру да бар. Бұл іске «Палау орталығы» кафесі мен әкімдік те қатысады. Жерлеу шараларын ұйымдастыру жұмыстары басталып кетті, — делінген хабарламада.

Еске сала кетейік, 26-27 ақпанға қараған түні Щучье қаласындағы кафеде газ баллоны жарылған болатын. Сол кезде алты адамның қаза тапқаны хабарланған.

Кейін құрбандар саны тоғызға жетті. Одан соң жансақтау бөлімінде жатқан тағы екі адам көз жұмды. Сондай-ақ жарылыс пен өрттен зардап шеккен бес адам Астанаға жеткізілгені хабарланған. Олардың төртеуі Ұлттық шұғыл медицинаны үйлестіру орталығына ұшақпен, тағы бірі жерүсті көлігімен жеткізілген.

Аталған оқиға бойынша қылмыстық іс қозғалды. Сонымен қатар «Палау орталығы» кафесінің иесі ұсталғаны белгілі болды.

4 наурызда ол екі айға қамауға алынды. 17 наурыздағы жағдай бойынша Ақмола облысындағы стационарларда үш пациент әлі де ем қабылдап жатыр.