Швейцарияда Давос 2026 экономикалық форумы өтіп жатыр. Live

«Гренландияны күшпен басып алмаймыз». Швейцарияның Давос қаласында өтіп жатқан Дүниежүзілік экономикалық форумда Дональд Трамп осылай деп мәлімдеді.

Бұл оның қайтсек те Грен-ландияға иелік етеміз деген, қатқыл ұстанымының айтарлықтай жұмсаруы ретінде қабылданды. Алып аралдың айналасындағы дау Вашингтонды еуропалық серіктестерінен оқшаулап тастаған еді.

Дональд Трамп Давосқа келеді дегенде саясаткерлермен қоса, Швейцария халқы да наразы болып, Цюрих көшелерін басып алды.

Демонстранттар «Трамп келмесін!» деп ұрандатып, Гренландияға қатысты көзқарасына қарсылық танытты. Аралды сатылмайды деп Данияның үніне үн қосты. Алайда шеру соңы тәртіпсіздікке ұласып, жергілікті полиция оларды тарқату мақсатында су шашып, көз жасаурататын газ қолданды.

Осылайша, у-шудың арасында форумның алғашқы күні Трампсыз басталып, жиындарға АҚШ-тың Қаржы және Сауда департаменттерінің өкілдері қатысып, Вашингтонның Брюссельге көңілінің толмайтынын ашық айтып, бүгінгі АҚШ президентінің баяндамасына Давос аудиториясын дайындағандай болды. Форум кулуарында Ақ үйдің арнайы өкілі Стив Уиткофф бастаған команда Кремль мамандарымен кездесіп жатқаны да БАҚ назарына ілінді. Бірер сағат бұрын өзіңіз айтқан мәлімдемемен Дональд Трамптың өзі де жұрт алдына шықты.

Дональд Трамп, АҚШ президенті:

- Еуропаның кейбір аймақтарын бүгінде тану қиын. Бұл - нашар жағдай. Мен Еуропаны жақсы көремін, оның өркендегенін қалаймын. Алайда қазір ол дұрыс бағытта дамып жатқан жоқ. Соңғы онжылдықтарда Батыста экономиканы өсірудің жалғыз жолы - мемлекеттік шығынды шексіз ұлғайту, бақылаусыз көші-қон және сыртқы импортқа тәуелділік деген түсінік орнықты. Ауыр өндірістен бас тартып, қолжетімді энергияның орнын жасыл технологиямен алмастыру - өрескел қателік болды. Байден әкімшілігі мен бірқатар батыс елдері осы жолды таңдады. Нәтижесінде бюджет пен сауда тапшылығы ұлғайып, адамзат тарихындағы ең ауқымды көші-қон толқынына жол ашылды.

Біз ешқашан ештеңе сұраған жоқпыз, сондықтан ештеңе алған да жоқпыз. Қаласам, тоқтатуға келмейтін күш қолданар едім. Бірақ олай істемеймін. Мен күш қолданбаймын және қолданғым да келмейді. Шын мәнінде, бұл - мен айтқан ең маңызды мәлімдемелердің бірі. АҚШ бар болғаны Гренландия деп аталатын бір аумақты ғана сұрап отыр. Ол жер бұрын біздің қорғауда болған. Бірақ Екінші дүниежүзілік соғыста немістерді, жапондарды, италиялықтарды және өзге де күштерді жеңгеннен кейін, Гренландияны құрметпен Данияға қайтарып бергенбіз.

Сондай-ақ алдағы уақытта АҚШ президенті НАТО бас хатшысы Марк Рюттемен, әлемдік корпорация директорларымен кездеседі. Одан бөлек Трамп Газаға байланысты Бейбітшілік кеңесінің ресми қол қою шарасын да Давоста өткізіп жіберуді көздеп отыр. Кең құрамдағы АҚШ делегациясы украиналық тараппен де келіссөздер жүргізеді деп жоспарланған.