Шымкентте ескі үйлерді бұзу тұрғындардың бір бөлігі үшін мәселеге айналды

Шымкентте ескі және апаттық үйлерден 600-ден астам отбасы көшіріледі. Мегаполистегі ауқымды реновация бағдарламасын 2030 жылға дейін аяқтау жоспарланған. Тұрғындарға жаңа баспана "бөлмеге бөлме" қағидаты бойынша беріледі. Десе де, кейбір тұрғындар жаңа пәтер кілтін алып жатса, енді біреулерінде сұрақтар туындап отыр, деп хабарлайды Tengrinews.kz 24.kz телеарнасына сілтеме жасап.

Телеарна мәліметінше, қазір Көксай шағын ауданынан көшіру жұмыстары белсенді жүріп жатыр. Жаңа пәтерлерге ескі үйлерде тұрған отбасылар ие болып жатыр. Қоныстой иелерінің бірі он жыл бойы апаттық баспанадан көшуді армандағанын айтады.

"Ескі пәтерімнің ауданы небәрі 24 шаршы метр болатын, үй де апаттық жағдайда еді. Ал жаңасы – 41 шаршы метр. Маған бәрі ұнайды. Егде жастағы адамдар үшін барлық қолайлы жағдай жасалған", – деп түсіндірді әйел.

Тұрғындарды көшіру, содан кейін ғимараттарды бұзу жұмыстары барлық тұрғынның келісімінен кейін ғана жүзеге асырылады. Көксайда бағдарламаға 23 көпқабатты үй енгізіліп, оның 15-і қоныстандырылды. Жарты ғасырдан астам уақыт бұрын салынған ескі және апаттық ғимараттар жақын арада бұзылады. Олардың орнына көпқабатты тұрғын үйлер мен әлеуметтік нысандар бой көтереді. Әзірге шағын ауданның көрінісі көңіл көншітпейді: шатырсыз, терезесі мен есігі жоқ ғимараттар тұр.

Қараусыз қалған алаңдар мен демонтаж жұмыстары көршілес қалған тұрғындар үшін үлкен сынға айналды. Адамдар су, жарық және газдың жиі өшіп қалатынына шағымданады, делінген материалда.

"Мұнда үйлердің бұзылып жатқанына екінші жыл болды, ал жеке сектор қалып қойды. Бізге үйлеріміз үшін ақшалай өтемақы төлеуге уәде берген, бірақ әзірге тыныштық. Күтіп жүрміз. Осының салдарынан судың сапасы нашарлап, жарық пен газды жиі өшіретін болды. Қыста не істейтінімізді білмеймін", – дейді тағы бір тұрғын.

Жеке секторға қатысты мәселе әзірге ашық күйінде қалып отыр. Ауқымды инвентаризация нәтижесінде Көксай шағын ауданындағы көптеген жеке үй иесінің құжаттары толық рәсімделмегені анықталды. Сондай-ақ заңдастырылмаған және деректер қоры мен құжаттарда жоқ өз бетінше салынған құрылыстар да бар.

"2030 жылға дейін қала бойынша 66 үйге қатысты бағдарлама бекітілді – бұл 600 пәтер. Барлық көпқабатты үйдің техникалық жағдайына тексеру жүргізілді. Тексеруді арнайы аккредиттелген және аттестатталған ұйымдар өткізді", – деді Шымкент қалалық құрылыс басқармасы басшысының орынбасары Ердәулет Әжібаев.

Бағдарламаны жеке инвесторлар есебінен жүзеге асыру жоспарланып отыр. Қазірдің өзінде үш компания қызығушылық танытып отыр. Құрылыс басқармасы егер басқа да ескі көпқабатты үйлердің тұрғындары реновацияға қосылғысы келсе, нысандар тізімі кеңейтілуі мүмкін екенін қоса кетті.

һ

Бізді Google-дың негізгі дереккөздер тізіміне қосыңыз