Шынайы хроника: Kazinform ның 105 жылдығына арналған кітап MNU ға сыйға тартылды

Қазақстан Республикасы Президентінің Телерадиокешені құрылымына кіретін Kazinform – елімізге халықаралық мәртебе алған алғашқы мемлекеттік ақпарат агенттігі ретінде танымал. Агенттік 105 жыл бойы саясат, экономика, білім, денсаулық сақтау, спорт, мәдениет және қоғам өмірінің басқа да маңызды салалары туралы сенімді және уақтылы ақпарат таратып келеді. Kazinform материалдары оқырманға 5 тілде, сондай-ақ латын графикасы мен Төте жазу қарпі бойынша да қолжетімді. 

Кездесу барысында MNU Провосты Анар Ибраева Kazinform редакциясын мерейтойымен құттықтап, Президент Телерадиокешені басшылығына сенімді серіктестік пен ынтымақтастық үшін алғысын білдірді. 

Айта кетейік, 2023 жылы MNU-да Телерадиокешенмен бірлесе Халықаралық журналистика мектебі ашылды. Аталған мектептің деканы Айгүл Жамалова студенттердің өндірістік практикадан өтуі, жұмысқа орналасуы және жетекші отандық және әлемдік журналистерден тәжірибе алуы үшін серіктестердің қолжетімді кең мүмкіндіктерін ерекше атап өтті.

Сонымен қатар Kazinform Басқарушы директоры Нағашыбек Алдан мерейтойлық кітап бойынша жүргізілген ауқымды жұмыс барысына тоқталды. Басылымда халықаралық ақпарат агенттігінің жаңалықтар әзірлеу ұстаханасының сан қырлы сырымен кәсіби құпиялары жазылған.

Өз кезегінде Нағашыбек Алдан болашақ журналистер үшін бұл кітап пайдалы оқу құралы болатынын жеткізді. 

Айта кетейік, «Kazinform. Шынайы хроника» кітабы университет кітапханасында оқырмандар үшін қолжетімді.