Шыңда шыныққан офицерлер

Офицерлер Алатаудың бөктеріндегі «Тау дайындық орталығында» шеберлігін шыңдап жатыр. Олар оқу-жаттығуға, елдің әртүрлі құрылымдық бөлімдерінен шақырылған. 

Орталық, Арнайы операциялар күштеріне қарайды. Бүгін Арнайы операциялар күштерінің құрылғанына төрт жыл толып отыр. Әскерилер қарапайым адамның аяғы жетпейтін жерде шынығып, қауіптің бетін қайтаруды үйренеді. 

Медеу шатқалындағы жартасқа арқанмен шығып, тәжірибе жинап жатқан бұл офицерлер еліміздің әр өңірінен келген. Нақтырақ айтсақ, Қорғаныс министрлігі, Ұлттық қауіпсіздік комитеті, Шекара қызметі және Мемлекеттік күзет қызметінің сардарлары. Барлығы 30 адам. Солардың бірі – Жетісу облысындағы десанттық-шабуылдаушы әскерінің капитаны Несіпбай Опабек. 

Несіпбай Опабек, 48386 әскери бөлімінің капитаны:
- Оқу-жаттығу жақсы өткізіліп жатыр. Нұсқаушылар жақсы түсіндіріп жатыр бізге және өзіміздің шеберлігімізді шыңдап жатырмыз. Практикалық тұрғыда біз жартасқа жоғары қарай өрмелеп және төмен қарай түсіп жүрміз. 

«Тау дайындық орталығында» бір мезетте 50-60 әскери қызметші шеберлігін шыңдай алады. Оларға таудағы қауіпсіздік пен ұрыс тәсілдерін білікті нұсқаушылар үйретеді. Теңіз деңгейінен 1300 метрден 4000 метрге дейінгі биіктіктегі жаттығу офицерлердің төзімділігін арттыра түседі. Тіпті мұнда шетелдік әскерилер де келіп, тәжірибе алады екен. 

Аманжол Рахметов, ҚР ҚМ «Тау дайындық орталығы» командирінің орынбасары:
- Келетін арнайы жасақтардың өздерінің қойған міндеттеріне байланысты  базалық курс және тереңдетілген курс, сондай-ақ нұсқаушыларды дайындау курстары өткізіледі. Әр курстың өзінің ерекшеліктері бар. Базалық курс екі апталық 88 сағаттан өтетін болса, тереңдетілген курс 3 апта мен 4 апта ортасында өтеді. 

«Тау дайындық орталығында» шеберлігін шыңдаған офицерлердің 50-і әдіскер-нұсқаушы мәртебесін алған. Олар қазір өздері жұмыс істейтін әскери бөлімдердегі сарбаздарды жаттықтырып жүр. Осы оқу-жаттығудың мақсаты – таулы аймақтағы ұрыс шеберлігін шыңдап, арнайы операцияларды мінсіз орындау. 

Аршын Кемелжан, тілші:
- Альпинизмде шыңның күрделілігіне байланысты алты түрлі деңгей бар екен. Мына құрал-жабдықтар соған сай таңдалады. Мысалы, қарапайым тауға шығу үшін бас киім, аяқ-киім, мұз балтасы, арқан, жұмар және сегіздік сынды құрал-жабдықтар міндетті түрде қажет. Олардың орташа салмағы 10 келіге жуықтайды. Әрмен қарай шың күрделі болған сайын құрал-жабдықтардың саны арта береді. 

Құрылғанына бес жыл болған «Тау дайындық орталығында» бүгінге дейін бес мыңға жуық офицер шеберлігін шыңдаған. Үздіктері жыл сайын өтетін халықаралық альпинистік сайыстарға қатысып тұрады. 

Авторлары: Аршын Кемелжан, Айдос Қалиев