Солтүстік Қазақстанда сталкинг бойынша 10 адам жазаланды

АСТАНА, 23 мамыр – Sputnik. Солтүстік Қазақстан облысында жыл басынан бері сталкингтің 10 фактісі тіркелді, деп хабарлайды Sputnik Қазақстан.

Маза бермейтін қоңыраулар, аңду, әлеуметтік желілер мен геолокация арқылы адамды бақылауға тырысу — мұның барлығы сталкингтің белгілері.

"Жыл басынан бері Солтүстік Қазақстан облысында осындай 10 факт тіркелді", - делінген полицияның ресми хабарламасында.

Полицейлердің айтуынша, кез келген адам бейтаныс адамның немесе тіпті жақын адамның қудалауына тап болуы мүмкін. Үнемі кездесуге ұмтылу, жеке ақпаратты рұқсатсыз тарату, психологиялық қысым көрсету, қызғаныш, жеке өмірді толық бақылауға тырысу және қорқыту әрекеттері үшін жаза қарастырылған.

Сталкинг фактілері туралы 111 сенім телефонына, облыстың қоғамдық қауіпсіздік басқармасының отбасылық-тұрмыстық зорлық-зомбылыққа қарсы күрес бөліміне 8 (7152) 61-25-30 нөмірі арқылы "102" арнасына хабарлауға болады.